Katër persona të dyshuar për dy vrasje tronditëse në Bruksel janë ekstraduar në Belgjikë, pasi u arrestuan në Spanjë dhe Francë. Sipas raportimeve në mediat belge, hetuesit dyshojnë se i njëjti grup qëndron pas ekzekutimit të një shqiptari pranë Parlamentit Evropian dhe vrasjes së policit belg Nordine El Talbi, brenda pak orësh më 12 tetor 2026.
Dy krime brenda së njëjtës ditë
Sipas versionit të raportuar nga mediat belge, ngjarja e parë ndodhi rreth orës 17:50 në rrugën Wiertz, në lagjen Elsene të Brukselit, pranë Parlamentit Evropian. Viktima shqiptare u qëllua me disa plumba në hollin e një pallati dhe humbi jetën në vend, pavarësisht ndërhyrjes së shërbimeve të emergjencës.
Identiteti i shqiptarit nuk është bërë publik. Hetuesit dyshojnë paraprakisht se bëhet fjalë për një larje hesapesh të lidhur me rrjetet e trafikut të drogës, madje në pistat e para është përmendur edhe mundësia e një ekzekutimi me pagesë.
Më pas u vra edhe efektivi belg
Vetëm disa orë më vonë, sipas autoriteteve belge, i njëjti grup dyshohet se ka qëlluar për vdekje edhe efektivin e policisë Nordine El Talbi, 41 vjeç, në lagjen Jette.
Polici ishte pjesë e një operacioni për gjetjen e një mjeti Volkswagen T-Cross, të vjedhur gjatë një grabitjeje me dhunë në Tubize. Kur forcat e rendit lokalizuan automjetin dhe iu afruan për kontroll, personat brenda hapën zjarr. El Talbi u godit në kokë dhe nuk mbijetoi.
Arrestimet në Spanjë dhe Francë
Tre prej të dyshuarve u arrestuan në Almería, ndërsa i katërti u kap në një stacion hekurudhor në Paris. Sipas raportimeve, personat e ndaluar në Spanjë dyshohet se po përpiqeshin të largoheshin drejt Marokut.
Njëri nga katër të ekstraduarit është i mitur. Të gjithë dyshohet se u larguan nga Belgjika pas ngjarjeve, çka ngre edhe më shumë pikëpyetje mbi lëvizjet e grupit pas dy krimeve.
Hetimi mbetet i hapur
Ndërkohë, në Bruksel janë arrestuar edhe dy persona të tjerë të dyshuar për përfshirje. Njëri është liruar nga Dhoma e Këshillit për mungesë provash, ndërsa tjetri vijon të mbahet në paraburgim.
Sipas autoriteteve belge, të dyshuarit janë nga Brukseli dhe njihen për lidhje me rrjetet e trafikut të drogës. Megjithatë, roli konkret i secilit dhe motivi i plotë i dy vrasjeve mbeten ende nën hetim.
Deri tani, pista kryesore e hetimit mbetet ajo e konflikteve për paratë e drogës, por autoritetet belge nuk kanë mbyllur ende tablonë e plotë të ngjarjes.
Ekstradimi i katër të dyshuarve e çon çështjen në një fazë më të ndjeshme, ku pritet të testohet sa të forta janë provat që lidhin të njëjtët persona me të dy krimet.