Përjashtimi i Elisa Spiropalit nga forumet e Partisë Socialiste, i njoftuar nga sekretari i përgjithshëm Blendi Klosi pas Asamblesë, ka rihapur një kapitull të vjetër brenda selisë rozë: largimet dhe spastrimit politike që kanë shoqëruar partinë prej vitesh. Bashkë me Spiropalin, nga forumet u përjashtua edhe Plarent Ndreca.
Vendimi i fundit dhe hija e një praktike të përsëritur
Versioni zyrtar i bërë publik pas mbledhjes së Asamblesë konfirmoi përjashtimin e Spiropalit dhe Ndrecës nga forumet e PS-së. Por ky nuk është një episod i izoluar në historinë e partisë.
Në PS, përjashtimet nga grupi parlamentar apo nga strukturat drejtuese janë shfaqur ndër vite si instrument për të disiplinuar zërat që dalin nga rreshti ose për të mbyllur përplasjet e brendshme politike.
2007, rasti Nano dhe goditja ndaj deputetëve
Një nga rastet më të bujshme daton në vitin 2007, kur Fatos Nano u la jashtë projektit politik të Partisë Socialiste. Në atë kohë, Edi Rama ua komunikoi gazetarëve se Nano nuk ishte më pjesë e këtij projekti.
Po atë vit, PS përjashtoi nga grupi parlamentar gjashtë deputetë socialistë: Paulin Sterkaj, Durim Lamaj, Durim Hushi, Bukurosh Stafa, Taulant Dedja dhe Hamit Kosta. Vendimi erdhi pasi ata votuan pro Bamir Topit për President të Republikës.
Kastriot Islami dhe përplasjet me mendimin ndryshe
Në vitin 2011, radha i erdhi Kastriot Islamit, i përjashtuar nga grupi parlamentar socialist. Sipas arsyetimit politik të kohës, vendimi lidhej me mosrespektimin e qëndrimit të partisë.
Ajo periudhë u shënua nga tensione të forta të brendshme dhe nga përplasjet me Lëvizjen për Mendim Ndryshe, ku përfshiheshin Ben Blushi, Arben Malaj, Andis Harasani dhe Marko Bello.
Nga Tom Doshi te Saimir Tahiri
Seria e largimeve vijoi edhe më pas. Në vitin 2015, Tom Doshi u përjashtua nga grupi parlamentar i PS-së.
Në vitin 2016, Koço Kokëdhima u shkarkua nga funksionet drejtuese në parti, ndërsa në vitin 2017 edhe Saimir Tahiri u përjashtua nga grupi parlamentar dhe forumet e Partisë Socialiste.
Lista u zgjat edhe pas 2021
Përjashtimet nuk mbetën vetëm te emrat e viteve të mëparshme. Në vitin 2021, Dritan Leli u përjashtua nga Partia Socialiste.
Vendimi i fundit ndaj Elisa Spiropalit dhe Plarent Ndrecës tregon se mekanizmi i goditjes së brendshme mbetet aktiv sa herë përplasjet politike arrijnë në pikën kur partia vendos të mbyllë debatet me përjashtim, jo me ballafaqim publik.
Historia e PS-së tregon se përjashtimet nuk kanë qenë përjashtim, por një mjet i përsëritur në menaxhimin e krizave të brendshme.
Nga Fatos Nano te Elisa Spiropali, lista e emrave ndryshon, por modeli politik mbetet i njohur: kur konfliktet thellohen, dera mbyllet nga lart.