Juventusi ka kthyer në darkë diferencën prej 4 pikësh ndaj Lacios ndjekëse, duke fituar 3-1 përballë Xhenoas në transfertë, në një ndeshje ku krijoi e dominoi lojën. Por mbi të gjitha, duket se Juventusi ka gjetur përsëri shkëlqimin e yjeve të tij, me Dibala, Ronaldo e Douglas Kosta që shënuan 3 gola të shkëlqyer.
Pas një pjese të parë ku Perin i rezistoi gjuajteve drejt kuadratit, në të dytën ai u dorëzua pas një aksioni individual të Dibala i cili nga e majta gjeti rrjetën duke e mposhtur në shtyllën e parë. Pak minuta më vonë, ishte Ronaldo ai që vendosi emrin e tij në listën e golashënuesve me një kryevepër pasi mori topin në gjysmëfushë dhe pasi bëri disa metra, lëshoi një goditje të pakapshme për portierin kundërshtar.
Po aq i bukur ishte edhe goli i Duglas Kosta me një harkim perfekt nga e majta, duke vulosur një fitore që për statistikë pa edhe golin e Pinamontit për vendasit pak minuta para fundit të sfidës. Me këtë sukses, Juventus vazhdon të ecë i qetë, i ndërgjegjshëm se me kthimin në formë të yjeve, vështirë se mund të lëshojë pikë rrugës para takimit direkt me Lacion.