Eksperët e shëdebit publik— e kanë thënë në mënyrë të përsëritur se maskat dhe distancimi fizik janë disa nga masat e thjeshta me ndikim të madh në parandalimin e përhapjes së koronavirusit. Edhe Presidenti dhe figura të larta të administratës e kanë theksuar rëndësinë e maskave kohët e fundit, megjithëse presidenti i reziston vendosjes së një mandati kombëtar për vënien e maskave. Në Teksas, një nga shtetet e goditura rëndë nga epidemia kohët e fundit, mjekët shprehen të dëshpëruar nga përmasat e problemit dhe injorimi i këshillave të ekspertëve nga shumë amerikanë.
Dr. Joseph Varon shprehet i revoltuar. Ai përballet me rritje të madhe të pacientëve me COVID-19, në nivele që kanë stresuar kapacitetet në spitalin ku ai punon në Hjuston të Teksasit. Megjithatë, përditë ai sheh njerëz rrugëve pa maskë, pa mbajtur distancë fizike.
“Po zhvilloj dy beteja: luftë kundër COVID-it dhe luftë kundër iditsisë. Njërën e zhvilloj me një farë shprese se do ta fitojmë. Por të dytën e kam gjithnjë e më të vështirë ta kuroj” thotë ai.
Dr. Varon është specialist i mushkërive dhe shef i stafit në Qendrën Mjekësore “United Memorial”. Ai përballet me një skenë që po bëhet normale: stafi mjekësor i mbingarkuar, duke u përpjekur të kujdesen për pacientët që mbushin përditë pavionet e spitalit.
“Kam punuar në mes të tërmeteve, në mes të sulmeve me bomba, në mes të cunameve. Kam punuar pas çdo katastrofe të imagjinueshme. Por kjo është më e rënda që kam parë. Ndoshta pasi është një situatë që vazhdon,” thotë ai.
Në këtë krizë, personeli mjekësor e ka paguar shtrenjtë dedikimin ndaj misionit të tyre. Shumë mjekë e infermierë janë sëmurur, disa kanë humbur jetën nga koronavirusi. Në stafin e Dr. Varon, infermierja Chrishtina Mathers rezultoi pozitive për koronavirus javën e kaluar, pasi u sëmur gjatë turnit:
“Diagnoza me koronavirus është gjëja më e rëndë që mund të dëgjosh. Më tronditi shumë. Njerëzit duhet të informohen më shumë. Gjithë kjo betejë, gjithë këto akuza e kundërakuza, janë të panevojshme. Njerëzit duhet të udhëhiqen nga mirësjellja e humanizmi. Duhet të na dëgjojnë ne. Ne nuk po gënjejmë. Përse do të gënjenim,” thotë infermierja Mathers.
Teksasi, Kalifornia dhe Florida janë bërë vija e frontit kundër koronavirusit këtë verë. Deri tani Teksasi është përballur me një dyfishim të rasteve dhe ritmet e vdekshërisë shkuan në 32% vetëm brenda javës së kaluar.
Shumë prej pacientëve të Dr. Varon nuk marrin frymë dot pa ndihmën e aparaturave. 67-vjeçari Riley Harrison tregon se kur kishin filluar simptomat kishte ndjerë se po i merrej fryma dhe se nuk kishte pasur fuqi të thërriste as të shoqen. Tani të dy janë shtruar në spital:
“Nëse të është mbushur mendja të vdesësh, luaj me COVID-in,” thotë ai. Riley dhe bashkëshortja nuk e dinë se si u infektuan, por ai paralajmëron të tjerë të ruhen dhe të mbrohen me çdo mënyrë nga infeksioni.