Policia spanjolle ka nisur hetimet për vrasjen e një shqiptari me armë zjarri, ngjarje e ndodhur mbrëmjen e së premtes.
Vrasja e shqiptarit, identiteti i të cilit nuk është zbuluar ende ndodhi pak minuta pas orës 11 në restorantin “The Orange Tree” në El Albir. Mësohet se viktima që kishte precedent të mëparshëm kriminal, ndërroi jetë pak minuta pasi u qëllua.
Sipas mediave vendase, dyshohet se ekzekutimi i tij lidhet me pastrimin e llogarive dhe me operacionin e nëntorit të kaluar ku u arrestuan gjashtë persona për krime të falsifikimit të dokumenteve, trafikut të drogës dhe përfshirjes në një grup kriminal.
Mediat raportojnë se një person i maskuar iu afrua vendit ku ndodhej viktima me partneren e tij, një grua me kombësi angleze, dhe e qëlloi atë disa herë. Të njëjtët dëshmitarë raportuan se ai kishte përdorur një pistoletë dhe pas të shtënave u largua.
Një kamerier në një restorant aty pranë raportoi se ata dëgjuan disa të shtëna, dhe një koleg i tij u përpoq të kryente manovrat e ndihmës së parë tek i plagosuri.
Kur arritën agjentët e Gardës Civile, viktima ishte i shtrirë në tokë dhe kishte pesë plagë të dukshme. Ai u transferua në gjendje shumë të rëndë në spital, por nuk ia doli të mbijetojë.
Policia Gjyqësore e Gardës Civile të Altea ka marrë përsipër hetimin e krimit. Nëntorin e kaluar, në një operacion të përbashkët nga Policia Kombëtare dhe Garda Civile, gjashtë persona u arrestuan në të njëjtën zonë për krime të pretenduara të falsifikimit të dokumenteve, trafikut të drogës dhe përkatësisë në një grup kriminal.
Midis të arrestuarve, të cilët u lanë të lirë nga autoriteti gjyqësor, kishte qytetarë të kombësive të ndryshme, njëri prej të cilëve ishte shqiptar. Aso kohe, u sekuestruan dy automjete të nivelit të lartë të vlerësuar në 130,000 euro, pajisje elektronike, karta bankare dhe telefona celularë, me një vlerë të përgjithshme prej 170,000 euro.
Vrasja e shqiptarit ndodhi vetëm disa ditë pasi, në një operacion nga Trupat e Policisë Kombëtare, disa anëtarë të një rrjeti rus u arrestuan në Altea, të akuzuar për pastrim parash dhe për përpjekje për tu infiltruar në institucionet publike. Një nga objektivat e kësaj bande ishte instalimi i një kampingu për automjete luksoze në Altea , një distancë e shkurtër nga vendi ku u krye krimi.