Pesë persona u plagosën pasditen e sotme në Përrenjas si pasojë e një aksidenti. Agim Blloshmi raporton se mes të lënduarve është edhe një këngëtar, Astrit Belba.
44-vjeçari është këngëtar i njohur i muzikës popullore. Ai është transportuar në spital së bashku me katër personat e tjerë që mbetën të lënduar.
Të plagosurit e tjerë janë Lulzim Skura 32 vjeç, i cili është transportuar në spitalin e Elbasanit, Muhamet Çela 69 vjeç, Armenda Iljazi 46 vjeç dhe Mevlud Iljazi 47-vjeç. Armenda Iljazi ndodhet në gjendje kome si pasojë e dëmtimeve që ka pësuar nga aksidenti, ndërsa bashkëshorti Mevlud Iljazi ndodhet jashtë rrezikut.
Dy makina e përfshira në aksident janë një “Benz” dhe një fuoristradë e cila ka përfunduar jashtë rrugë.
Dyshohet se shkak i këtij aksidenti të jetë bërë shpejtësia tej normave të lejuara dhe një parakalim i gabuar. Po punohet për zbardhjen e rrethanave.