Kryebashkiaku i Shkodrës, Benet Beci, i cili është marrë zyrtarisht nën hetim nga SPAK, ka reaguar me ironi ndaj spekulimeve që qarkullonin për dorëheqjen e tij si kryetar bashkie.
Beci, i cili të premten u paraqit në Prokurorinë e Posaçme për të dhënë dëshminë e tij në lidhje me hetimet për shkelje të kryera gjatë detyrave të mëparshme, ka hedhur poshtë zërat për dorëheqjen e tij në një postim në rrjetet sociale.
“Nuk e di ku dreqin e kanë marrë vesh disa portale që kam dhënë dorëheqjen, se ishte sekret deri nesër! Po tani që doli po e them edhe arsyen: Nesër zgjidhem unë President i Amerikës me kërkesë të dy kandidatëve të tjerë, meqë e tregova në Shkodër se jam i pëlqyeshëm për të dy palët,” shkruan Beci me ironi.
Pavarësisht këtij reagimi humoristik për dorëheqjen, Beci nuk përmendi drejtpërdrejt hetimin e SPAK në statusin e tij. Ndërkohë, avokati i tij është njohur me të dhënat e mbledhura nga SPAK në përfundim të hetimeve, të cilat po trajtohen për verifikimin e shkeljeve të dyshuara gjatë detyrave të tij të mëparshme.
Kjo çështje ka tërhequr vëmendjen e publikut, ndërsa Beci përpiqet të mbajë një qëndrim të qetë dhe me humor përballë akuzave dhe spekulimeve.