Ngjarja tronditëse në zonën e “Xhamllikut” në Tiranë, ku një efektiv i Policisë Rrugore u rrëzua nga kati i 11-të i një pallati, ka nxitur spekulime të shumta. Burime të mediave bëjnë me dije se polici mund të ketë ndaluar disa ditë më parë djalin e një prej biznesmenëve më të mëdhenj në vend, pas një aksidenti automobilistik në gjendje të dehur.
Polici 57-vjeçar, Azbi Spahiu, aktualisht ndodhet në gjendje kritike në Spitalin e Traumës. Ndonëse kabllot e internetit ngadalësuan rënien, dëmtimet e rënda kanë përkeqësuar gjendjen e tij.
Heshtja e institucioneve
Në deklaratën e saj zyrtare, Policia e Tiranës ka thënë se po heton rrethanat e ngjarjes, por nuk ka dhënë asnjë informacion mbi spekulimet lidhur me përfshirjen e djalit të biznesmenit. As zëdhënësi i policisë dhe as Agjencia për Mbikëqyrjen Policore (AMP) nuk kanë pranuar të komentojnë nëse polici është marrë në pyetje ose ka qenë objekt i ndonjë procedimi disiplinor.
Pritet transparenca
Pas spekulimeve në media, qytetarët kërkojnë transparencë nga institucionet për të zbardhur rrethanat e ngjarjes. Ndërkohë, opinioni publik mbetet në pritje të detajeve shtesë për këtë incident që ka tronditur komunitetin.