Presidentja e Komisionit Evropian, Ursula von der Leyen, ka prezantuar një plan me pesë pika për të mbledhur rreth 800 miliardë euro në mbështetje të mbrojtjes së Evropës. Ky plan synon të forcojë kapacitetet ushtarake të vendeve anëtare dhe të sigurojë ndihmë të menjëhershme për Ukrainën, pas pezullimit të ndihmës ushtarake nga presidenti amerikan Donald Trump.
“Europa në një epokë riarmatimi”
Von der Leyen deklaroi se BE-ja duhet të jetë e gatshme të rrisë ndjeshëm shpenzimet për mbrojtjen, duke theksuar se siguria e kontinentit është e kërcënuar. Ajo njoftoi planin “Ri-pajis Evropën”, një iniciativë për një kontinent më të sigurt dhe më të fortë.
Pesë pikat kryesore të planit
- Liberalizimi i fondeve publike – Shtetet anëtare që rrisin shpenzimet e mbrojtjes me 1.5% të PBB-së do të kenë akses në mbështetje financiare.
- 650 miliardë euro hapësirë fiskale – Kjo masë synon të krijojë mundësi të reja financimi për ushtritë evropiane.
- Përdorimi i buxhetit të BE-së – Fondet e BE-së do të përdoren për investime në mbrojtje dhe zhvillim teknologjik ushtarak.
- Kreditim prej 150 miliardë euro për mbrojtjen – Një instrument i ri financiar do t’u mundësojë vendeve të BE-së të investojnë në kapacitete ushtarake.
- Mobilizimi i kapitalit privat – Plani përfshin angazhimin e sektorit privat për të financuar industrinë e mbrojtjes.
Frika për rritjen e kontrollit të Brukselit
Disa liderë evropianë kanë shprehur shqetësimin se ky plan mund të rrisë kompetencat e Komisionit Evropian në çështjet e mbrojtjes, një fushë tradicionalisht e menaxhuar nga shtetet anëtare.
Ndërkohë, BE-ja pritet të diskutojë këtë plan në një samit urgjent të enjten, ku do të përcaktohen hapat e mëtejshëm për zbatimin e tij.