Duket se Avokatja e Popullit, Erinda Ballanca, më në fund e ka zbuluar se në Shqipëri ekziston një problem serioz me paraburgimin e qytetarëve. Me një deklaratë që vjen pas viteve të heshtjes, ajo shprehu shqetësimin e saj për numrin e lartë të të paraburgosurve, duke theksuar një fakt që dihej prej kohësh: presumimi i pafajësisë duhet respektuar!
Për vite me radhë, avokatët, organizatat ndërkombëtare dhe madje edhe vetë të paraburgosurit, kanë ngritur alarmin se Shqipëria po e përdor paraburgimin si një dënim të parakohshëm. Dhe ja ku vjen Avokatja e Popullit, e cila, ndoshta pas ndonjë raporti të radhës nga Këshilli i Europës, e kuptoi se 62% e popullatës së burgjeve përbëhet nga të paraburgosur – një shifër alarmante që vendos Shqipërinë në vendin e parë për këtë fenomen në Europë.
Por mos u shqetësoni, Avokatja e Popullit tani do të “shqyrtojë” situatën! Me një deklaratë të ndjerë, ajo bëri thirrje për balancimin e sigurisë me respektimin e të drejtave të njeriut. Me fjalë të tjera, pas kaq vitesh, e kuptoi që nuk duhet të dënohesh para se të gjykohesh!
Ndërkohë, në realitetin shqiptar, arresti në burg vijon të jetë zgjidhja e parë, edhe pse ligji e parashikon si masën e fundit. Siç argumentojnë avokatët, shumë njerëz kalojnë muaj apo vite në paraburgim pa u marrë as në pyetje, ndërsa gjykatat shpesh heshtin përballë kërkesave të palëve.
Nëse e gjithë kjo duket e njohur, mos u çudisni! Shqiptarët janë mësuar që institucionet të kujtohen për të drejtat e tyre vetëm kur situata bëhet e padurueshme – dhe siç duket, Avokatja e Popullit më në fund “u zgjua” nga letargjia për të na treguar se paraburgimi është një problem i madh. Faleminderit për njoftimin!