Në një debat të ashpër në emisionin “Të Paekspozuarit” në MCN TV, analisti Andi Bushati dhe deputeti i PD-së, Flamur Noka, shkëmbyen replika të forta mbi rezultatin e zgjedhjeve të 11 majit dhe ndikimin e strategut amerikan Chris LaCivita në fushatën opozitare.
Bushati: Rama ju ka grirë votat e diasporës, jeni 70-30!
Bushati argumentoi se Edi Rama ka siguruar avantazhin elektoral përmes manipulimit të votave të diasporës, duke sugjeruar se raporti real në këtë komunitet është 70% për Ramën dhe 30% për opozitën.
Flamur Noka e hodhi poshtë këtë pretendim, duke deklaruar se zgjedhjet do të fitohen nga opozita, pasi tashmë strategu i fushatës së Donald Trump, Chris LaCivita, është përfshirë në hartimin e strategjisë së PD-së.
Flamur Noka: “Kini durim ju… Edi Rama sot ka zbritur hije vdekjeje në fytyrë. Kishte një Ramë që qeshte, por tani s’qesh më.”
Ylli Rakipi: “Pra, ju mendoni se do të fitoni falë LaCivita?”
Flamur Noka: “Çdo votë është e rëndësishme. Nuk ka më hapësirë për manipulime.”
LaCivita, shpresa e PD-së për të mundur Ramën?
Sipas Nokës, prania e strategut republikan Chris LaCivita në fushatën e PD-së ka ndryshuar situatën politike në favor të opozitës, duke e cilësuar atë si një faktor që ka trembur Ramën dhe ka ndryshuar dinamika elektorale.
Debati mbi koalicionet e PD-së: “Çdo votë vlen, edhe e Kujtim Gjuzit”
Gjatë debatit, Bushati dhe gazetari Andi Tela e kritikuan opozitën për aleancat e saj me figura të diskutueshme, si Kujtim Gjuzi dhe kandidatë të tjerë nga partitë e vogla.
Andi Tela: “Po bëni koalicion me njerëz që i kanë prishur skemat e opozitës më parë. Këta ju lanë Ramën edhe 4 vite në pushtet!”
Flamur Noka: “Nuk ka rëndësi se cilët janë aleatët. Çdo votë e tyre është votë djerse dhe dinjiteti, ndryshe nga votat e hajdutëve të Edi Ramës.”
Opozita gati për të kërkuar edhe votat e “tradhtarëve” për të rrëzuar Ramën
Në një deklaratë të mëvonshme, Noka tha se opozita do të kërkojë votat e çdo shqiptari, edhe të atyre që në të kaluarën janë konsideruar si tradhtarë politikë. Ai theksoi se qëllimi kryesor është rrëzimi i Edi Ramës nga pushteti.
Debati midis Bushatit dhe Nokës reflekton ndarjet e mëdha politike dhe strategjike brenda opozitës në prag të zgjedhjeve të 11 majit. Ndërkohë që Bushati paralajmëron një epërsi të Ramës për shkak të manipulimeve elektorale, Noka është i bindur se pjesëmarrja e LaCivita dhe strategjia e re e opozitës do të sjellin një ndryshim të madh në rezultatin zgjedhor.