Pas arrestimit në zyrën e Bashkisë së Tiranës, kryebashkiaku Erion Veliaj u shoqërua nga forcat e rendit drejt Drejtorisë së Policisë së Tiranës, ku do të njihej me masën e arrestit me burg, vendosur nga Gjykata Kundër Korrupsionit dhe Krimit të Organizuar (GJKKO).
Arrestimi dhe mbulimi i imazhit
Në momentin e daljes nga zyra e bashkisë, Veliaj u filmua nga gazetarët dhe u kapën pamje të qarta të tij teksa hipte në makinë. Megjithatë, sapo ai mbërriti në drejtorinë e policisë, struktura shtetërore u mobilizuan për të mbrojtur imazhin e tij.
Policia vendosi një tendë në hyrje, për të bllokuar çdo pamje të tij të prangosur, duke treguar kujdes të jashtëzakonshëm për të mos njollosur figurën e kryebashkiakut që tashmë ndodhet pas hekurave.
Dërgimi në burgun e sigurisë së lartë
Pas mbylljes së procedurave në drejtorinë e policisë, Veliaj u dërgua në burgun pranë Mine Pezës, në një qeli të bllokut të sigurisë. Nga burimet mësohet se ai do të qëndrojë i izoluar në pritje të vendimit përfundimtar të gjykatës.
Arresti shtëpiak për Ajola Xoxën
Ndërkohë, bashkëshortja e Veliajt, Ajola Xoxa, ndonëse u vendos në arrest shtëpie, masa ende nuk është ekzekutuar pasi ajo ndodhet për trajtim mjekësor jashtë Shqipërisë.
Manipulimi i perceptimit publik
Rasti i trajtimit të Veliajt nga Policia e Shtetit ka ngjallur debat, pasi krijon përshtypjen e një mbrojtjeje të veçantë për një figurë të lartë të PS-së, ndryshe nga raste të tjera kur të arrestuarit ekspozohen në publik pa masa të tilla.
Kjo sjellje tregon një tjetër nivel të ndikimit politik mbi institucionet shtetërore, ku disa zyrtarë të lartë trajtohen me kujdes të veçantë, ndërsa të tjerët ekspozohen hapur si shembuj të “drejtësisë së re”.