Mario Përlleshaj, i akuzuar për vrasjen e 14-vjeçarit Martin Cani, ka bërë rekurs në Gjykatën e Lartë për të kërkuar lirinë. Avokati i tij synon të rrëzojë vendimin e mëparshëm të Gjykatës së Apelit në Tiranë, e cila më 10 shkurt refuzoi kërkesën e të miturit për ndryshimin e masës së sigurisë nga “arrest në burg” në një masë më të lehtë.
Akuzat dhe dënimi i mundshëm
Mario Përlleshaj akuzohet për “Vrasje në rrethana cilësuese” dhe “Prodhimi, mbajtja, blerja apo shitja pa leje e armëve të ftohta”, sipas Kodit Penal. Dënimi për këtë vepër penale varion nga 20 vite burg deri në burgim të përjetshëm, por për shkak të moshës së mitur, maksimumi që mund të marrë ai është 12 vite burg. Aktualisht, ai ndodhet në burgun e të miturve në Kavajë.
Ngjarja dhe hetimet
Ngjarja e rëndë ndodhi më 18 nëntor 2024, kur 14-vjeçari Martin Cani humbi jetën pasi u qëllua me thikë në bark nga bashkëmoshatari i tij. Dy të miturit kishin një konflikt që nisi brenda shkollës “Fan Noli” në Tiranë dhe agravoi jashtë ambienteve të saj. Përlleshaj dhe viktima ishin në klasë paralele, dhe sipas dëshmitarëve, përplasja mes tyre ishte përshkallëzuar disa ditë më parë.
Familja e viktimës ka kërkuar dënimin maksimal, ndërsa avokati i të miturit pretendon se ka rrethana lehtësuese që duhet të merren parasysh për ndryshimin e masës së sigurisë.
Gjykata e Lartë pritet të shqyrtojë kërkesën në ditët në vijim.