Kryeministri Edi Rama ka reaguar me një video në Facebook, duke ironizuar Lulzim Bashën, i cili i është drejtuar në një video duke e pyetur se ku është fshehur.
“Ti je i pavdekshëm, stres zero, gjumi top!”
Rama, i cili tha se po shkonte drejt Fierit kur mori videon e Bashës, nuk e kurseu ironinë:
“Po mo Lul, si mos të pyes për ty, na thave sytë! Si thanë vdiq Luli, vetëm unë se besova, se ti e di që je i pavdekshëm! Stres zero, gjumi top, 7×7 bëjnë 42, se luan topi. Ku ka vdekje që të afrohet ty!”
Ai vazhdoi më tej duke thënë se Basha ka ndezur motorët, duke i dhënë një tjetër goditje ironike:
“Shyqyr, bravo Oriolës dhe demokratëve euroatlantikë që s’të kanë lënë vetëm, se misioni yt për të më larguar mua duhet të vazhdojë! Me ty fiton, edhe kur humb fiton, prandaj forca!”
“Më ke lënë sipër çadrës tënde!”
Rama gjithashtu rikujtoi periudhën e protestave të PD-së në çadrën e famshme para Kryeministrisë, duke shtuar me humor:
“Jam aty ku më ke lënë Lul, sipër çadrës tënde. Ti poshtë meje duke kënduar himnin kombëtar, dhe unë punoja poshtë e lart me zërin tënd në sfond.”
Ai përmendi edhe marrëveshjen Rama-Basha, duke i kujtuar liderit të demokratëve se e ka parë gjithmonë si një rival të dobët:
“Jam trembur se ti do fitosh prapë, po hallall se e meriton! Vetëm bëhu i gjallë, mos m’u ndaj, hajde forca demokratët euroatlantikë, erdhi dita, Rama ik!”
Basha ende nuk ka reaguar
Deri më tani, Lulzim Basha nuk ka kthyer një përgjigje ndaj ironisë së Ramës, por reagimi i tij pritet me interes, duke qenë se kjo përplasje e fundit mes tyre ka ndezur diskutime në rrjetet sociale dhe politikën shqiptare.