Disa nga arkitektët kryesorë të fushatave të Donald Trump janë angazhuar në Shqipëri për të ndihmuar rikthimin në pushtet të ish-kryeministrit Sali Berisha. Gazeta amerikane Washington Post ka raportuar se Chris LaCivita, drejtues i fushatës së Trump në 2024, Tony Fabrizio, anketuesi afatgjatë i Trump, dhe Paul Manafort, i cili drejtoi fushatën e Trump në 2016, kanë udhëtuar në Tiranë për të ndihmuar opozitën shqiptare në zgjedhjet e 11 majit.
LaCivita, që tashmë është bërë figurë e njohur në mitingjet e Partisë Demokratike, u shpreh: “Është e vetmja Parti Demokratike për të cilën do të mendoja ndonjëherë të punoja.” Ai ka qenë i pranishëm në disa takime në Shqipëri dhe është shfaqur publikisht përkrah liderëve demokratë, duke përdorur retorikë dhe simbole të ngjashme me ato të fushatës së Trump, përfshirë kapelën e kaltër me numrin 1 dhe sloganin “Bëjeni Shqipërinë Madhështore”.
Berisha ka nënshkruar gjithashtu një kontratë dyvjeçare prej 6 milionë dollarësh me kompaninë republikane të lobimit “Continental Strategy”, për të ndihmuar në përmirësimin e marrëdhënieve me Shtetet e Bashkuara dhe për të kërkuar heqjen e statusit “non grata”, të vendosur nga Departamenti Amerikan i Shtetit në vitin 2021. Firma drejtohet nga Carlos Trujillo, ish-ambasador i SHBA në Organizatën e Shteteve Amerikane, dhe përfshin edhe Alberto Martinez, ish-shef kabineti i senatit të Marco Rubio.
Financimi i kësaj fushate vjen përmes një fondacioni të krijuar rishtazi, “Make Albania Great Again”, i regjistruar nga shqiptaro-amerikani Nuredin Seci në New Jersey. Megjithatë, burimi i saktë i fondeve nuk është verifikuar dhe SPAK ka nisur hetimet për këtë marrëveshje.
Ndërkohë, edhe qeveria e Edi Ramës ka lidhje me ish-administratën Trump. Në dhjetor, Kabineti qeveritar miratoi një marrëveshje me kompaninë e Jared Kushner, dhëndrit të Trump, për zhvillimin e një resorti luksoz në ishullin e Sazanit me vlerë 1.6 miliardë dollarë. Kjo kontratë i dha kompanisë statusin e investitorit strategjik për 10 vjet.
Gjatë gjithë fushatës, Berisha është pozicionuar si një figurë Trumpiane, duke e paraqitur veten si viktimë e një ndjekjeje politike të sponsorizuar nga George Soros dhe administrata Biden. Fushata e tij fillimisht u shoqërua me sloganin “Bëjeni Shqipërinë të Madhe Përsëri”, por u ndryshua në “Bëjeni Shqipërinë Madhështore” për të shmangur reagimet që lidhen me idenë e “Shqipërisë së Madhe”.
LaCivita ka mbrojtur Berishën publikisht, duke e cilësuar atë si një “mik të vërtetë të Amerikës” dhe duke krahasuar situatën e tij me atë të Trump: të dy të ndjekur penalisht, të dy të paraqitur si të persekutuar nga një sistem që – sipas tyre – është i politizuar dhe i korruptuar.
Nëse kjo strategji do të rezultojë e suksesshme në Shqipëri, mbetet për t’u parë. Por fakti që emra kaq të mëdhenj të politikës amerikane janë përfshirë në fushatën elektorale shqiptare, e kthen këtë proces në një betejë me përmasa ndërkombëtare.