Partia Socialiste vijon të kryesojë në rang kombëtar, ndërsa janë numëruar mbi 1000 kuti votimi në të gjithë vendin. Rezultatet paraprake sinjalizojnë një fitore të qartë për të majtën, ndërkohë që gara vijon me ritme të shpejta në qarqe të rëndësishme si Tirana, Durrësi dhe Shkodra.
Rezultatet e deritanishme kombëtare janë si më poshtë:
- PS: 53% – 83 mandate
- PD-ASHM: 34% – 51 mandate
- PSD: 4% – 3 mandate
- NISMA-SHB: 4% – 1 mandat
- MUNDËSIA: 3% – 1 mandat
- BASHKË: 1% – 1 mandat
- KEA: 1% – 0 mandate
- DZH: 0% – 0 mandate
Në Tiranë, PS ruan avantazhin me 48%-49% të votave, ndërsa PD-ASHM ndjek me rreth 34%-35%, sipas kutive të numëruara deri më tani. Në Durrës, rezultati është ngjyrë rozë me mbi 2000 vota epërsi për PS ndaj PD-ASHM, ndërsa në Shkodër, PD-ASHM ruan një epërsi të lehtë prej 1 mijë votash.
Ndërkohë, procesi i numërimit të votave të diasporës në Parkun Olimpik të Tiranës është ndërprerë përkohësisht dhe do të rifillojë në orën 10:30.
Gara për mandate mbetet e hapur në disa qarqe kyçe, por trendi i deritanishëm favorizon qartë Partinë Socialiste. Rezultatet përfundimtare priten të konfirmohen në orët në vijim, ndërsa pjesëmarrja dhe dinamika në qarqe të veçanta mund të ndikojnë bilancin përfundimtar të mandateve në Kuvend.