Banka e Shqipërisë ka nisur një reformë të re për të lehtësuar kostot e transaksioneve bankare për qytetarët dhe bizneset, duke propozuar ndryshime në kuadrin rregullator të sistemeve të pagesave që ajo administron. Rregulloret e reja synojnë uljen e komisioneve për transfertat e parave, veçanërisht për ato të kryera në mënyrë elektronike, dhe përmirësimin e aksesit të publikut në shërbimet financiare.
Dyfishim i kufirit për transfertat pa komision
Në projekt-rregulloren e re “Për funksionimin e sistemit të klerimit të pagesave me vlerë të vogël – AECH”, propozohet që për transfertat me vlerë më të vogël ose të barabartë me 40 mijë lekë, të cilat realizohen në mënyrë elektronike, të mos aplikohet asnjë komision. Ky është një përmirësim i dukshëm në krahasim me rregulloren aktuale, ku përjashtimi nga komisioni aplikohet për transfertat deri në 20 mijë lekë.
Ky ndryshim dyfishon kufirin e transfertave që mund të kryhen pa kosto për qytetarët, duke nxitur më tej përdorimin e kanaleve elektronike si internet banking dhe mobile banking, dhe duke reduktuar përdorimin e parasë fizike në ekonomi.
Komisione të reduktuara për transfertat me vlera më të mëdha
Për transfertat në vlera nga 40 mijë lekë deri në 1 milion lekë, projektrregullorja përcakton një tavan komisioni prej 100 lekësh, ndërsa për ato nga 1 milion deri në 5 milion lekë, maksimumi i lejuar është 500 lekë.
Transfertat që variojnë nga 5 milionë lekë deri në 10 milionë lekë nuk duhet të kenë komision më të lartë se 1000 lekë, ndërsa për ato nga 10 milionë lekë deri në 15 milionë lekë, komisioni i sipërm nuk duhet të kalojë 1400 lekë.
Krahasuar me kuadrin aktual, ku komisionet për transfertat deri në 1.5 milionë lekë shkojnë deri në 500 lekë në degë banke dhe 250 lekë për e-banking, ky ndryshim përfaqëson një ulje të konsiderueshme tarifash.
Favorizim për bankimin elektronik
Rregullorja ruan gjithashtu detyrimin që komisionet për transfertat me e-banking të jenë deri në 50% më të ulëta krahasuar me ato të kryera fizikisht në degë. Për shembull, për një transfertë deri në 1 milion lekë e realizuar në mënyrë elektronike, komisioni maksimal nuk mund të kalojë 50 lekë.
Ky incentiv për bankimin elektronik është pjesë e strategjisë së Bankës së Shqipërisë për modernizimin dhe dixhitalizimin e sistemit bankar, duke nxitur përdorimin e teknologjive të reja dhe rritjen e efikasitetit në sektorin financiar.
Sistemi i ri i pagesave të shpejta
Ndryshimet në kuadrin rregullator vijnë paralelisht me punën për ndërtimin e një sistemi kombëtar të pagesave të shpejta (instant payments), bazuar në modelin TIPS që ofron Banka e Italisë. Ky sistem do të mundësojë transferta në kohë reale mes bankave dhe institucioneve financiare, në çdo orë dhe ditë të vitit, duke sjellë një epokë të re në pagesat digjitale në Shqipëri.
Reformat e propozuara nga Banka e Shqipërisë janë një hap i rëndësishëm drejt një sistemi bankar më të përfshirës dhe më ekonomik për qytetarët, që jo vetëm lehtëson barrën financiare të individëve dhe bizneseve, por edhe rrit besimin dhe përdorimin e shërbimeve elektronike bankare në vend.