Banorët e Tragjasit, Orikumit dhe Dukatit u mblodhën këtë të hënë para godinës së SPAK-ut, ku zhvilluan një protestë dhe depozituan zyrtarisht një kallëzim penal për atë që e konsiderojnë një skemë të gjerë tjetërsimi pronash në zonën e Rivierës.
Në kallëzimin e tyre, banorët pretendojnë se zyrtarë të qeverisë, biznesmenë dhe persona të tjerë të lidhur me institucione vendase e të huaja janë përfshirë në përvetësimin e pronave përmes dokumenteve të falsifikuara dhe skemave të sofistikuara të pastrimit të parave. Ata shkojnë më tej duke deklaruar se në këtë rrjet dyshohet të jenë të përfshirë edhe ish-zyrtarë amerikanë, të cilët, sipas tyre, kanë qenë pjesë e mekanizmit të tjetërsimit.
Në kallëzimin voluminoz drejtuar SPAK, thuhet ndër të tjera:
“Dyshimi se pjesë e këtij grupi janë edhe shtetas amerikanë e bën situatën më të ndërlikuar, pasi aktiviteti kriminal ka kaluar kufijtë e Shqipërisë duke përfshirë juridiksione të ndryshme financiare e ligjore. Pasuritë e përfituara me dokumenta të falsifikuara mund të jenë përdorur për të pastruar paratë e krimit nëpërmjet sistemeve financiare ndërkombëtare dhe kompanive të krijuara jashtë vendit.”
Banorët theksojnë se skema e dyshuar është zhvilluar përmes mekanizmave kompleksë: krijimit të kompanive shell, lëvizjeve të dyshimta bankare, investimeve në prona brenda dhe jashtë Shqipërisë, si dhe përfshirjes së ndërmjetësve me ndikim politik e ndërkombëtar.
Në dokumentin e paraqitur, kërkohet që hetimet të shtrihen edhe në Shtetet e Bashkuara të Amerikës:
“Hetimi duhet të zgjerohet në SHBA për të identifikuar llogaritë bankare, investimet, kompanitë dhe çdo pasuri që mund të jetë përdorur për pastrimin e produkteve të veprës penale. Në bazë të të dhënave të deritanishme, dyshohet se pjesë e grupit janë shtetas amerikanë ose subjekte juridike të regjistruara në SHBA.”
Në kallëzim theksohet se një hetim i tillë ndërkombëtar është i domosdoshëm për të zbardhur të gjithë rrjetin e organizuar dhe për të dokumentuar bashkëpunimin ndërkombëtar të individëve të përfshirë.
Sipas banorëve, struktura e dyshuar kriminale ka shfrytëzuar ndikime politike, ekonomike dhe ndërkombëtare, duke mundësuar tjetërsimin e qindra hektarëve tokë në një nga zonat më të çmuara turistike të vendit. Ata kërkojnë sekuestrimin e menjëhershëm të pasurive dhe ndërprerjen e çdo procedure të mëtejshme që lidhet me përdorimin e këtyre pronave.
Protesta u zhvillua pa incidente, ndërsa banorët paralajmëruan se do të vijojnë me veprime të tjera publike nëse nuk shohin hapa konkretë nga SPAK dhe institucionet ndërkombëtare me të cilat kërkojnë bashkëpunim.