Kreu i Partisë Demokratike, Sali Berisha, ka publikuar pretendime të reja mbi atë që ai e përshkruan si një takim 7-orësh tensioni të lartë mes kryeministrit Edi Rama dhe Belinda Ballukut, pas pezullimit të saj nga detyra me vendim të GJKKO-së.
Në një deklaratë të fortë, Berisha shprehet se “sipas veshëve të mureve”, takimi mes tyre ka qenë i mbushur me debate të ashpra dhe kërcënime të ndërsjella. Ai liston tre kërkesa që sipas tij Balluku i ka paraqitur Ramës:
Kërkesat që Berisha pretendon se ka bërë Belinda Balluku
1. Shtyrja për 72 orë e zbatimit të vendimit të GJKKO-së.
Sipas Berishës, Rama nuk pranoi të ndërhynte, ndërsa edhe telefonatat e Ulëziut – të cilin Berisha e përmend si figurë ndërmjetësuese – rezultuan të pasuksesshme.
2. Që çështja t’i dërgohej Gjykatës Kushtetuese nga Këshilli i Ministrave dhe jo individualisht prej saj.
Sipas Berishës, Balluku kërkoi që barra e përballjes me Kushtetuesen të mos binte mbi të.
3. Ndalimi i linçimit publik në mediat pranë qeverisë.
Berisha pretendon se Balluku kërkoi ndërprerjen e “korit të sulmeve”, duke përmendur konkretisht Top Channel.
Berisha: Balluku i ka kartat në dorë
Në postimin e tij, Berisha shton se Balluku zotëron dokumente që, sipas tij, mund të provojnë se “tuneli i Llogarasë dhe aeroporti i Vlorës janë zbatim i drejtpërdrejtë i urdhrave të Ramës”.
Ai aludon se kushtet që ajo ka vënë lidhen pikërisht me këtë dosje të nxehtë.
Sipas tij, Ulëziu ka qenë i thirrur si “dëshmitar” i tensioneve në takimin e gjatë Rama–Balluku, të cilin Berisha e quan “divorc politik”.