Një ngjarje e rëndë është shënuar mesditën e sotme në qytetin e Vlorës, ku është dhunuar avokati Kujtim Cakrani, përfaqësues ligjor i ish-Presidentit të Republikës, Ilir Meta. Sipas të dhënave të deritanishme, incidenti ka ndodhur rreth orës 13:30 në ambientet e një pike karburanti, në momentin kur avokati po furnizonte automjetin e tij.
Burime pranë hetimit bëjnë me dije se Cakrani është përfshirë fillimisht në një konflikt verbal me dy persona ende të paidentifikuar. Konflikti dyshohet se ka nisur për motive të parëndësishme, përfshirë edhe një situatë parkimi, megjithatë vetë avokati ka deklaruar se nuk beson se ky ka qenë shkaku real i përplasjes.
Situata ka agravuar shpejt, duke kaluar nga fyerjet verbale në dhunë fizike. Dy personat e përfshirë dyshohet se kanë ushtruar forcë ndaj avokatit, duke e goditur fillimisht në fytyrë dhe më pas në pjesën e pasme të kokës, me mjete të forta. Si pasojë e goditjeve, Cakrani ka pësuar dëmtime serioze dhe është rrëzuar në tokë.
Menjëherë pas ngjarjes, ai është transportuar me urgjencë drejt Spitalit Rajonal të Vlorës, ku ndodhet i shtruar nën kujdesin e mjekëve. Sipas informacioneve mjekësore paraprake, avokati ka pësuar dëmtime të rënda në zonën e kokës dhe po merr trajtim intensiv në repartin përkatës. Gjendja e tij shëndetësore monitorohet nga stafi mjekësor.
Ndërkohë, policia ka nisur hetimet për zbardhjen e plotë të rrethanave të ngjarjes. Janë marrë deklarime nga dëshmitarë okularë dhe po analizohen pamjet e kamerave të sigurisë në zonën ku ndodhi incidenti, me qëllim identifikimin e autorëve dhe sqarimin e motivit të vërtetë të sulmit.
Autoritetet hetimore nuk përjashtojnë asnjë pistë dhe bëjnë me dije se çështja po trajtohet me prioritet, për shkak të rrezikshmërisë së veprës penale dhe pasojave të rënda të shkaktuara ndaj viktimës. Hetimet vijojnë.