Pamje të reja të publikuara nga autoritetet amerikane hedhin më shumë dritë mbi atë që sipas prokurorisë ishte një sulm i paramenduar gjatë darkës së gazetarëve të Shtëpisë së Bardhë në Uashington. Në qendër të dosjes është 31-vjeçari Cole Tomas Allen, i cili akuzohet se u afrua i armatosur në aktivitetin ku ndodhej edhe presidenti Donald Trump.
Foto në hotel pak para incidentit
Sipas materialeve të dorëzuara në gjykatë, Allen është fotografuar në një dhomë hoteli pak para ngjarjes së 25 prillit. Në pamjet e publikuara nga autoritetet, ai shfaqet duke pozuar para pasqyrës me disa armë të lidhura në trup, përfshirë një thikë dhe një çantë me municion.
Prokurorët i kanë paraqitur këto foto si pjesë të provave me të cilat kërkojnë që i dyshuari të mbahet në paraburgim deri në zhvillimin e gjyqit. Deri në një vendim përfundimtar të drejtësisë, pretendimet mbeten version i organit të akuzës.
Çfarë pretendojnë hetuesit për lëvizjet e tij
Sipas hetimeve, rreth orës 20:03 Allen kishte bërë foto të vetes në dhomë, i veshur me rroba formale dhe me pajisje që, sipas memorandumit, përfshinin mbajtëse arme në shpatull, pincë dhe prerëse telash. Autoritetet thonë se këto sende u gjetën më pas në posedim të tij.
Në dokumente thuhet gjithashtu se për rreth 30 minuta ai kishte kontrolluar disa faqe interneti për transmetime live të darkës dhe për praninë e presidentit. Më pas, sipas versionit të prokurorisë, ai zbriti drejt sallës ku po zhvillohej aktiviteti.
Pika e sigurisë dhe evakuimi i zyrtarëve
Sipas prokurorëve, Allen kishte me vete një pistoletë gjysmë-automatike, një armë gjahu me pompë dhe tre thika, kur kaloi me forcë një pikë kontrolli sigurie gjatë aktivitetit të së shtunës në mbrëmje.
Dokumentet pretendojnë se ai hoqi një pallto të gjatë të zezë që, sipas hetuesve, i shërbente për të fshehur armën e gjahut, përpara se të futej me vrap përmes detektorit të metaleve duke e mbajtur armën me të dyja duart.
Gjatë incidentit, Trump, zëvendëspresidenti JD Vance, anëtarë të kabinetit dhe zyrtarë të tjerë u evakuuan me urgjencë nga salla e hotelit Washington Hilton pasi u dëgjuan të shtëna. Një agjent i Shërbimit Sekret mbeti i plagosur, por jo rëndë.
Dosja e prokurorisë dhe rreziku i dënimit
Materialet e reja zbulojnë edhe se Allen kishte mbajtur shënime në telefon për udhëtimin e tij nga Kalifornia drejt Uashingtonit, duke përshkruar edhe peizazhe të vëzhguara gjatë rrugës. Prokuroria i përdor këto elemente për të mbështetur tezën se sulmi ishte i përgatitur paraprakisht.
Organi i akuzës e cilëson ngjarjen si një akt të paramenduar, të dhunshëm dhe të kalkuluar për të shkaktuar vdekje, duke këmbëngulur se i dyshuari paraqet rrezik për shoqërinë. Nëse shpallet fajtor, Allen përballet me burgim të përjetshëm.
Çështja mbetet tani në duart e drejtësisë amerikane, ndërsa dokumentet e publikuara deri më tani paraqesin kryesisht versionin e prokurorisë dhe të autoriteteve hetimore.
Publikimi i fotove dhe detajeve të reja pritet të shtojë vëmendjen mbi mënyrën si u menaxhua siguria në një aktivitet ku ishin të pranishëm figurat më të larta të administratës amerikane.