Hetimi për vdekjen e Hulk Hogan është mbyllur përfundimisht në SHBA. Sipas raportit përfundimtar të Policisë së Clearwater në Florida, legjenda e WWE, emri i vërtetë Terry Bollea, ka ndërruar jetë nga shkaqe natyrore, pa prova për përfshirje kriminale apo rrethana të dyshimta.
Raporti përfundimtar mbyll çështjen
Sipas dokumentit hetimor, që mbyll verifikimet për vdekjen e Hogan në korrik 2025 në moshën 71-vjeçare, autoritetet thonë se nuk kanë gjetur asnjë element që ta çojë çështjen përtej një vdekjeje natyrale.
Raporti, me 72 faqe, përfshin dëshmi të personave të pranishëm, të dhëna mjekësore, pamje nga kamerat e sigurisë dhe inspektimin e trupit. Versioni zyrtar i hetuesve është se nuk rezulton asnjë provë për vepër penale ose rrethana të dyshimta.
Problemet shëndetësore të dokumentuara para vdekjes
Sipas materialeve hetimore, Hogan kishte kaluar probleme serioze shëndetësore në javët para se të humbte jetën. Në dokumente përmenden leuçemia, aritmia kardiake, pneumonia dhe insuficienca renale.
Raporti evidenton gjithashtu se ai kishte kaluar disa ndërhyrje kirurgjikale dhe shtrime në spital gjatë viteve të fundit, një tablo mjekësore që, sipas autoriteteve, mbështet përfundimin për shkaqe natyrore.
Çfarë ndodhi në momentet e fundit
Në momentin kur ndaloi së marrë frymë, pranë tij ndodheshin bashkëshortja Sky Daily Hogan, një infermiere kujdestare dhe një terapiste okupacionale. Sipas raportit, bashkëshortja telefonoi menjëherë shërbimin e emergjencës.
Po sipas të njëjtit dokument, të treja nisën manovrat e reanimimit kardiopulmonar deri në mbërritjen e ekipit mjekësor.
Dyshimet fillestare dhe autopsia private
Pas vdekjes së Hogan kishte dalë edhe një dyshim fillestar, kur një terapist kishte ngritur mundësinë që shkaku të lidhej me një dëmtim të nervit frenik gjatë një operacioni të mëparshëm. Më vonë, sipas raportit, ai e tërhoqi këtë pretendim dhe pranoi se kishte folur në gjendje të rënduar emocionale.
Mjeku ligjor lokal arriti në përfundimin se Hogan kishte pësuar atak në zemër, por nuk autorizoi autopsi të plotë. Më pas familja financoi një autopsi private, e cila, sipas dokumenteve, konfirmoi shkakun natyror të vdekjes dhe nuk gjeti elementë traumatikë apo toksikologjikë.
Me mbylljen e hetimit, versioni zyrtar për vdekjen e Hulk Hogan mbetet ai i shkaqeve natyrore.
Hogan konsiderohet një nga figurat më të njohura në historinë e mundjes profesionale dhe një emër që la gjurmë të forta në WWE dhe industrinë e argëtimit.