Një nga dosjet më të mëdha të viteve të fundit për trafik ndërkombëtar kokaine dhe pastrim parash ka prodhuar masa arresti dhe një valë sekuestrimesh në Shqipëri. Sipas versionit zyrtar të SPAK, bëhet fjalë për një grup të strukturuar me bazë shqiptare, ku përmenden Shpëtim Aliu dhe Dritan Gjika, i dyshuar se ka qarkulluar dhjetëra ton kokainë nga Amerika Latine drejt Europës, ndërsa fitimet i ka futur më pas në ekonomi përmes ndërtimit, pasurive të paluajtshme dhe shoqërive tregtare.
10 masa arresti, por shumica nuk janë në duart e autoriteteve
Me kërkesë të SPAK, GJKKO ka caktuar masën “arrest në burg” për 10 shtetas shqiptarë: Nikoll Bibaj, Isa Aliu, Sokol Bibaj, Florjan Musaj, Armando Pacani, Denis Matoshi alias Eldi Dizdari, Naldi Yzeiraj, Oklid Aliu, Dritan Gjika dhe Shpëtim Aliu.
Policia njoftoi se gjatë kontrolleve të kryera më 16 qershor 2026 është ekzekutuar masa vetëm ndaj personit me inicialet F.M. Ndërkohë, sipas autoriteteve, 7 persona të tjerë dyshohet se ndodhen jashtë Shqipërisë, ndërsa vijojnë kërkimet për 2 të tjerë që mendohet se fshihen në vend. Ky bilanc lë të hapur pikëpyetjen klasike: sa efektive janë goditjet e shpallura me bujë, kur pjesa më e madhe e të dyshuarve nuk kapen menjëherë?
Pesë episode të dokumentuara dhe dyshime për të paktën 50 ton kokainë
Sipas dosjes hetimore, prokurorët kanë dokumentuar 5 episode të trafikimit të kokainës, ku në total janë sekuestruar 8 ton e 960 kilogramë. Ngarkesa e parë, 700 kg, u bllokua në maj 2020 në portin e Waasland në Antverp, e fshehur në një kontejner me pjesë këmbimi automjetesh të ardhur nga Kina.
Më pas, në qershor 2020, u sekuestruan 2.010 kg në Guayaquil të Ekuadorit, me destinacion Holandën. Sipas hetimit, droga ishte ndarë me logot “Jaguar”, “Shqiponja” dhe “BB”. Në gusht 2020 u bllokuan 1.100 kg në Roterdam, ndërsa në dhjetor të po atij viti u sekuestruan edhe 4.1 ton kokainë, po në Holandë.
Episodi i pestë lidhet me një ngarkesë prej 1 ton e 50 kg të bllokuar në vitin 2021 në Kolumbi, me destinacion final Francën. Përtej këtyre rasteve, SPAK pretendon se grupi mund të ketë trafikuar të paktën 50 ton kokainë gjatë viteve 2019-2021 në Amerikën Latine, Brazil, Belgjikë dhe Holandë. Kjo mbetet aktualisht një tezë hetimore që do të duhet të provohet në gjykatë.
Paratë cash në Shqipëri dhe skema e dyshuar e pastrimit
Sipas SPAK, një pjesë e madhe e fitimeve nga trafiku është sjellë cash në Shqipëri, fillimisht jashtë sistemit bankar, për t’u investuar më pas në ndërtim, hoteleri, pasuri të paluajtshme, toka dhe blerje aksionesh në kompani.
Në qendër të kësaj skeme, sipas hetuesve, është përdorur edhe një shoqëri që paraqitej si nënkontraktore, “Aliu Road House”. Dyshimi është se kompania është përdorur për të justifikuar qarkullimin e fondeve dhe për të fshehur origjinën e tyre, përmes blerjeve fiktive të kuotave të kapitalit me vlera shumë më të ulëta nga ato nominale.
Hetimi përshkruan një mekanizëm të njohur në dosjet e pastrimit të parave: marrje kontrolli të kompanive me kosto minimale, qarkullim fondesh përmes huave mes personave dhe subjekteve të lidhura, dhe krijim i një historie ekonomike formale që, sipas prokurorisë, do të shërbente për të humbur gjurmën e parasë.
491 pasuri nën sekuestro, nga vila në Lalëz te 209 llogari bankare
Me vendim të GJKKO-së, të kërkuar nga SPAK, janë sekuestruar në total 491 pasuri të luajtshme dhe të paluajtshme, me një vlerë të dyshuar rreth 150 milionë euro. Vetë prokuroria thekson se kjo është një shifër paraprake dhe se vlera e saktë do të verifikohet gjatë hetimit.
Në listën e pasurive të bllokuara përfshihen 121 objekte, mes tyre vila në zona rezidenciale dhe në Gjirin e Lalzit, hotele, toka në bregdet, si edhe 209 llogari bankare. Përmasat e sekuestrimit tregojnë se hetimi nuk është fokusuar vetëm te droga e kapur jashtë vendit, por sidomos te mënyra se si dyshohet se fitimet janë futur në tregun shqiptar.
Operacioni është zhvilluar me pjesëmarrjen e autoriteteve partnere nga Kolumbia, Ekuadori, Franca, Holanda, Eurojust, Europol dhe NCA. Megjithatë, përtej njoftimeve triumfaliste, mbetet për t’u parë sa nga kjo pasuri do të mbetet realisht e bllokuar dhe sa nga akuzat do t’i rezistojnë procesit gjyqësor.
Dosja pritet të testojë jo vetëm forcën e SPAK në goditjen e krimit të organizuar, por edhe aftësinë e shtetit për të ndjekur paratë deri në fund, pa u mjaftuar me shifra të mëdha në konferenca dhe komunikata.
Për momentin, versioni zyrtar flet për një rrjet që ndërtoi pasuri marramendëse me para kokaine dhe i strehoi ato në Shqipëri. Faza vendimtare nis tani: në gjykatë dhe në verifikimin real të pasurive të sekuestruara.