Tiranë – Tensionet janë përshkallëzuar këtë të martë para Kuvendit të Shqipërisë, ku protesta e zhvilluar jashtë godinës është shoqëruar me ndërhyrjen e forcave të policisë dhe arrestimin e disa pjesëmarrësve.

Sipas informacioneve nga vendngjarja, policia ndërhyri për të larguar protestuesit nga hyrja e Parlamentit dhe për të krijuar akses për hyrje dhe dalje në institucion. Gjatë ndërhyrjes u shoqëruan disa persona.

Mes të arrestuarve ndodhet edhe Dritan Goxhaj, i njohur si një nga organizatorët e protestës. Bashkë me të është arrestuar edhe Shkëlzen Bushi, i cili ka qenë aktiv në organizimin dhe zhvillimin e protestave të fundit.

Ndërkohë, një pjesë e protestuesve janë zhvendosur drejt Drejtorisë së Policisë së Tiranës, ku kanë marshuar për të kërkuar lirimin e të arrestuarve.

Situata jashtë Kuvendit mbetet e tensionuar, ndërsa në zonë është shtuar prania e forcave të rendit, përfshirë edhe efektivë të FNSH-së të pajisur me mjete mbrojtëse.

Protesta e kësaj të marte është shoqëruar me disa incidente, përfshirë përplasje verbale dhe fizike mes protestuesve dhe policisë, si edhe tentativa për të bllokuar lëvizjen e zyrtarëve që hynin ose dilnin nga Parlamenti.

Deri tani, Policia e Shtetit nuk ka bërë publike një njoftim zyrtar mbi numrin e personave të arrestuar apo veprat penale që u atribuohen atyre. Pritet që autoritetet të japin detaje shtesë në orët në vijim.