Një vatër e madhe zjarri në Rethimno të Kretës vijon të mbetet jashtë kontrollit, ndërsa erërat e forta po e shtyjnë flakën në një front që, sipas autoriteteve greke, kalon 15 kilometrat. Bilanci i deritanishëm është i rëndë: mijëra persona janë larguar nga zonat e rrezikuara dhe tre zjarrfikës kanë humbur jetën në operacione të ndryshme.
Front i gjatë zjarri dhe ndërhyrje e kufizuar nga ajri
Sipas versionit zyrtar, mëngjesin e sotëm janë shtuar ndjeshëm forcat në terren, me 224 zjarrfikës, 53 automjete dhe 11 ekipe këmbësore të angazhuara në zonë.
Mjetet ajrore u ngritën sapo nisi dita, por erërat e forta penguan ndërhyrjen në pjesën më të madhe të frontit. Kjo e ka bërë më të vështirë frenimin e përhapjes së flakëve në jug të Rethimnos.
Evakuim masiv në Agia Galini
Gjatë natës u zhvillua një operacion i gjerë evakuimi në zonën turistike të Agia Galinit. Rreth 2 mijë turistë të huaj u larguan nga hotelet dhe ambientet ku ishin akomoduar, për t’u transferuar në vende të sigurta.
Autoritetet lokale pretendojnë se, në total, nga zona më e gjerë janë larguar mijëra banorë dhe vizitorë. Për strehimin e tyre janë vënë në dispozicion dyshekë, ushqime dhe sende të nevojës së parë, me ndihmën e Kryqit të Kuq, policisë, bashkive dhe vullnetarëve.
Dëme në toka bujqësore, banesa dhe blegtori
Flakët kanë përfshirë sipërfaqe bujqësore, ullishte, stane, kafshë dhe banesa. Sipas autoriteteve, aktualisht nuk ka një kërcënim të drejtpërdrejtë për një zonë të banuar, megjithatë situata mbetet me rrezik të lartë.
Zjarri nisi pasditen e së mërkurës në zonën Kria Vrisi dhe, i ndihmuar nga era, u përhap me shpejtësi drejt jugut të ishullit.
Tre viktima mes zjarrfikësve, alarm edhe në ishuj të tjerë
Dy zjarrfikës, 58 dhe 25 vjeç, humbën jetën pasi mbetën të bllokuar nga flakët gjatë operacionit. Një zjarrfikës i tretë vdiq në një tjetër front zjarri në Gythio të Peloponezit.
Në Plomari të Lesvosit situata paraqitet më e përmirësuar, edhe pse erërat po krijojnë vatra të reja. Në Sitia, zjarri është kufizuar në një majë mali të vështirë për t’u arritur dhe, sipas autoriteteve, nuk kërcënon zona të banuara.
Zjarre janë regjistruar edhe në ishuj të tjerë, përfshirë Parosin, ndërsa autoritetet greke mbeten në alarm të lartë për shkak të erërave në Egje, që pritet të arrijnë deri në tetë ballë.
Pamja që vjen nga Greqia mbetet e rëndë: një front i gjatë zjarri, evakuime masive dhe humbje jete në radhët e zjarrfikësve, ndërsa kushtet atmosferike po e mbajnë situatën në kufijtë e emergjencës.