Përpjekja e radhës për të zhbllokuar formimin e institucioneve në Kosovë ka përfunduar sërish pa rezultat. Albin Kurti dhe Lumir Abdixhiku u takuan pasditen e së mërkurës, por edhe kjo raund bisedimesh nuk prodhoi marrëveshje mes dy palëve.
Takimi i dytë mbyllet pa ujdi
Sipas raportimeve nga Prishtina, takimi mes kreut të Vetëvendosjes, Albin Kurti, dhe kreut të Lidhjes Demokratike të Kosovës, Lumir Abdixhiku, përfundoi pa një dakordësi për ngritjen e institucioneve.
Ky ishte takimi i dytë mes tyre në një përpjekje për të gjetur një formulë politike, por edhe këtë herë palët dolën pa një rezultat konkret.
Deklarata e Kurtit pas takimit
Pas daljes nga takimi, Kurti dha një koment të shkurtër, duke lënë të kuptohet se negociatat nuk kanë prodhuar ende asgjë të prekshme.
“Nuk kemi lajme, përderisa s’kemi marrëveshje. Po, kur ta realizojmë marrëveshjen, do të mund t’ju njoftojmë”, u shpreh ai.
Edhe tentativa e parë kishte dështuar
Një ditë më parë, Kurti dhe Abdixhiku ishin takuar edhe në ambientet e Kuvendit të Kosovës, por as ai takim nuk solli marrëveshje për formimin e institucioneve.
Përsëritja e një takimi pa rezultat e thellon paqartësinë politike dhe lë pezull pritshmëritë për një zgjidhje të shpejtë mes dy forcave politike.
Për momentin, bisedimet mes LVV dhe LDK mbeten pa produkt politik, ndërsa procesi për ngritjen e institucioneve vijon të jetë i bllokuar.