Një ngjarje skandaloze ka ndodhur në zonën e Astirit në Tiranë, me protagonistë policinë e shtetit. Një qytetar ka dërguar një video në redaksinë e JOQ Albania një tjetër episod dhune të ndërmarrë nga Policia e Lleshit, e cila duket se ka vendosur të terrorizojë qytetarët.
Siç shihet dhe në video, dy policët godasin me shpulla një drejtues mjeti që kanë ndaluar. Sipas qytetarit që ka dërguar pamjet, qytetari ishte duke udhëtuar me familjen e tij, por nuk dihen arsyet se pse ai u ndalua. Në video shihet qartë që ai nuk bën rezistencë ndaj policëve, por pavarësisht kësaj ata e qëllojnë të dy me shpulla, ndërsa më pas e shoqërojnë për në automjetin e policisë.
Ky episod dhune nga Policia e Lleshit vjen pak ditë pasi një adoleshent 15-vjeçar u dhunua barbarisht në zonën pranë Liqenit Artificial në Tiranë. Dhuna kafshërore e policëve, të cilët shtrinë me fytyrë në asfalt adoleshentin dhe e goditën me grushte e shpulla ngjalli indinjatë popullore, ndërsa Policia e Shtetit bëri një reagim qesharak duke bërë vetëm pezullimin e njërit prej policëve, ndonëse ishin 5 punonjës policie që e rrahën barbarisht të riun.