Shqipëria ka arritur një fitore të rëndësishme në Tbilisi, duke mposhtur Gjeorgjinë 0-1 në grupin 1 të Ligës B të Nations League. Kjo fitore rikthen kuqezinjtë te suksesi pas dy humbjeve radhazi dhe i barazon me 6 pikë me skuadrën gjeorgjiane. Për më tepër, kjo ndeshje thyen serinë e gjatë të pathyeshmërisë së Gjeorgjisë në stadiumin Mikheil Meskhi, duke shënuar fitoren e parë të Shqipërisë kundër tyre pas 19 vitesh.
Përballë më shumë se 20 mijë tifozëve vendas, Shqipëria u shfaq me disa ndryshime në formacion, por çerekorëshi i parë ishte i vështirë për kuqezinjtë. Gjeorgjia ushtroi presion të fortë dhe krijoi disa raste të rrezikshme për të shënuar. Zivzivadze pati një mundësi të artë në minutën e 6’, por nuk arriti të përfundojë saktë përballë portierit Strakosha. Davitashvili gjithashtu rrezikoi dy herë brenda një minute, por Strakosha arriti të bëjë një ndërhyrje spektakolare dhe të mbrojë portën.
Reagimi i Shqipërisë erdhi në minutën e 16’, kur Tuci, pas një asisti nga Asani, gjuajti në diagonale, por u ndal nga portieri Loria. Loja u ekuilibrua më pas, dhe të dy skuadrat nuk krijuan shumë hapësira për sulme të rrezikshme.
Ndeshja u vendos në minutën e 46’, kur Bajrami depërtoi fuqishëm në zonën kundërshtare dhe pasoi te Tuci, i cili shërbeu topin për Asllanin. Gjuajtja e tij e fuqishme nuk i la asnjë mundësi portierit kundërshtar, duke çuar Shqipërinë në avantazh 0-1. Pjesa e dytë u kontrollua me kujdes nga Shqipëria, e cila tregoi një performancë akademike në mbrojtje, duke përballuar presionin e Gjeorgjisë.
Në minutën e 56’, Bajrami humbi një mundësi të mirë për të dyfishuar rezultatin, ndërsa në minutën e 69’, Daku, sapo futur në lojë, nuk arriti të shënojë me kokë. Gjeorgjia pati një pretendim për një penallti, por arbitri nuk ndërhyri. Seferi gjithashtu humbi një shans të mirë në kundërsulm. Megjithatë, Shqipëria arriti të rezistojë sulmit final të vendasve dhe të sigurojë një fitore të rëndësishme.
Kjo fitore jo vetëm që thyen një histori të gjatë humbjesh ndaj Gjeorgjisë, por gjithashtu i ngjit kuqezinjtë në pozita më të favorshme në grup, duke u rikthyer në garë për suksesin në Nations League.