Kjo recetë e biskotave me copëza çokollate është një ndër të preferuarat tona, të shijshme dhe të lehta për t’u përgatitur! Kemi provuar shumë receta, por kjo është e përkryer. Brumi nuk ka nevojë të qëndrojë në frigorifer, gjë që e shpejton shumë procesin e gatimit. Biskotat rezultojnë super të buta, të shkrifta dhe të mbushura plot me copa çokollate!
Përbërësit për 20-22 biskota:
250g gjalp në temperaturë ambienti
100g sheqer
150g sheqer kaf
2 vezë
360g miell 00
1 lugë çaji pluhur pjekës
1 pako sheqer vanilje
Një majë luge kripë
1 filxhan çaji copëza çokollate
Hapat e përgatitjes:
1. Parangrohja e furrës: Nxeheni furrën në 180°C dhe shtroni një tavë me letër furre.
2. Përgatitja e brumit: Në një tas të madh, rrihni gjalpin e zbutur me sheqerin e bardhë dhe sheqerin kaf derisa masa të bëhet e fryrë. Shtoni një nga një vezët dhe ekstraktin e vaniljes, duke i përzier mirë.
3. Shtimi i përbërësve të thatë: Në një tas tjetër, përzieni miellin me pluhurin pjekës dhe kripën. Shtoni gradualisht përbërësit e thatë tek masa me gjalp dhe vezë, duke i përzier me kujdes derisa të bashkohen plotësisht. Në fund, shtoni copëzat e çokollatës dhe përzieni mirë.
4. Formimi i biskotave: Me ndihmën e një luge akulloresh, formoni topa brumi dhe vendosini në tavë, duke lënë pak hapësirë mes tyre. Piqini për 10-12 minuta ose derisa anët e biskotave të marrin ngjyrë të artë.
5. Ftohja: Pasi t’i nxirrni nga furra, lërini biskotat të qëndrojnë në tavë për 5 minuta para se t’i hiqni me kujdes. Lërini të ftohen plotësisht ose shijojini të ngrohta, por me kujdes pasi janë delikate.
Këshillë: Nëse hani vetëm një biskotë në ditë, nuk do të keni asnjë problem!