Shkodër – Një ngjarje tronditëse ndodhi këtë të mërkurë në Shkodër, ku 32-vjeçari Arlind Bushati, i biri i ish-kandidatit të PD-së për kryetar bashkie, Xhemal Bushati, humbi jetën në spital pasi nuk arriti t’i mbijetojë plagëve të marra. Ky akt i dhunshëm e çoi në tre numrin e viktimave të këtij atentati të përgjakshëm.
Më herët, në vendngjarje humbi jetën Hamza Lici, vëllai i vogël i Ibrahim Lici-t, i njohur si një figurë e përfshirë në konfliktet e Shkodrës. Të shtënat erdhën nga një automjet tip Range Rover, i cili u gjet më pas i djegur pranë fshatit Golem, së bashku me dy armë automatike të dyshuara të përdorura nga autorët.
Gjatë përpjekjes për të shmangur breshëritë e plumbave, automjeti i Licit dhe Bushatit devijoi duke goditur një motoçikletë ku udhëtonte një çift. Si pasojë, 56-vjeçarja Flutura Basha humbi jetën, ndërsa bashkëshorti i saj 67-vjeçar po lufton për jetën në spital.
Ende nuk dihet kush ishte shënjestra kryesore – 23-vjeçari Lici apo 32-vjeçari Bushati. Në automjetin e tyre, policia zbuloi tre pistoleta, por mbetet e paqartë nëse kanë arritur t’i përdorin ato për t’u mbrojtur. Pak javë më parë, Bushati ishte kërcënuar në pedonalen e Shkodrës nga dy persona të armatosur me motor, të cilët u larguan pa e qëlluar.
Autoritetet po hetojnë ngjarjen për të zbuluar motivet dhe përgjegjësit pas këtij akti tronditës, ndërsa qyteti i Shkodrës përjeton një tjetër episod dhune të rëndë në rrugët e tij.