Pamjet e publikuara tregojnë momentin kur presidenti ukrainas, Volodymyr Zelensky, largohet me nxitim nga Shtëpia e Bardhë, pas një debati të ashpër me presidentin amerikan, Donald Trump, dhe zëvendëspresidentin JD Vance.
Takimi mes dy liderëve, i cili fillimisht pritej të përfundonte me një marrëveshje mbi mineralet e rralla mes SHBA dhe Ukrainës, u ndërpre në mënyrë të papritur, duke çuar në anulimin e konferencës së përbashkët për shtyp. Trump e mbylli bisedën me një mesazh të qartë për Zelenskyn: “Kthehuni kur të jeni gati për paqe”.
Një zëdhënës i Shtëpisë së Bardhë konfirmoi se marrëveshja për mineralet e rralla nuk u nënshkrua, një vendim që reflekton tensionet e thella mes dy palëve. Ndërsa Zelensky u largua dukshëm i irrituar, Trump e theksoi se pa mbështetjen amerikane, Ukraina do të ishte pushtuar.
Ky incident shënon një moment të ri për marrëdhëniet SHBA-Ukrainë, duke ngritur pikëpyetje mbi të ardhmen e mbështetjes amerikane për Kievin dhe drejtimin e negociatave për paqen me Rusinë.