Procesi i votimit për primaret e Partisë Demokratike (PD) në 12 qarqet e vendit është përmbyllur me një pjesëmarrje të konsiderueshme. Votimi nisi në orën 08:00 dhe përfundoi në shumicën e degëve në orën 18:00, ndërsa në disa zona vijoi deri sa votuesit e fundit përfunduan procesin.
Sipas Komisionit të Organizimit dhe Kontrollit të Operacioneve Elektorale (KOKOE) pranë PD-së, deri në orën 16:00 ishin regjistruar 41,666 votues në shkallë kombëtare. Tirana regjistroi pjesëmarrjen më të lartë me 10,779 votues, e ndjekur nga Fieri me 4,240 dhe Korça me 3,738 votues.
Çfarë pritet më tej?
Pas mbylljes së votimit, kutitë e votimit nga të gjitha degët e Tiranës do të grumbullohen në selinë e PD-së, ku do të nisë procesi i numërimit. Rezultatet finale pritet të përcaktojnë edhe pragun e votave për secilin kandidat, duke vendosur renditjen e tyre për zgjedhjet parlamentare të 11 majit.
Kryesia e PD do të jetë institucioni që do të vendosë se cilët kandidatë do të përfshihen në listën e mbyllur dhe cilët do të jenë pjesë e listës së hapur në garën elektorale.
Ky proces shihet si një test i rëndësishëm për strukturat e PD-së dhe si një përgatitje për fushatën elektorale, ku gara për deputetë pritet të jetë e ashpër mes figurave të njohura dhe emrave të rinj brenda partisë.
Në orët në vijim pritet që PD të publikojë rezultatet përfundimtare dhe të bëjë të qartë formacionin me të cilin do të hyjë në zgjedhjet parlamentare të 11 majit.