Në Pallatin e Brigadave në Tiranë po zhvillohet një mbledhje informale e qeverisë, e thirrur nga kryeministri Edi Rama, ku po diskutohet strategjia elektorale e Partisë Socialiste për zgjedhjet parlamentare të 11 majit.
Diskutimet për programin elektoral
Fokusi kryesor i mbledhjes është hartimi i një platforme elektorale që synon sigurimin e mandatit të katërt radhazi për PS-në. Plani përfshin projekte zhvillimore dhe objektivin për anëtarësimin e Shqipërisë në Bashkimin Europian brenda dekadës së ardhshme.
Përcaktimi i kandidatëve për deputetë
Drejtuesit politikë të qarqeve kanë dorëzuar listën e emrave të propozuar për kandidatë në zgjedhjet e ardhshme. Këto propozime pritet të shqyrtohen në një mbledhje të posaçme të kryesisë së PS përpara afatit të 12 marsit, kur listat zyrtare duhet të dorëzohen në Komisionin Qendror të Zgjedhjeve.
PS synon fitoren në zgjedhje
Mbledhja e qeverisë vjen në një moment kyç për mazhorancën, e cila synon të ruajë avantazhin elektoral dhe të bindë elektoratin me projekte konkrete dhe një fushatë të fuqishme. Kryeministri ka kërkuar një analizë të thelluar mbi angazhimin e deritanishëm dhe hapat e ardhshëm për të siguruar një rezultat të suksesshëm në zgjedhjet e 11 majit.