Presidenti i SHBA-së, Donald Trump, ka marrë një vendim të pazakontë duke revokuar lejet e sigurisë për Hillary Clinton, Kamala Harris dhe një numër ish-zyrtarësh të lartë amerikanë. Vendimi vjen pas masave të mëparshme kundër Joe Biden-it dhe familjes së tij, të cilëve gjithashtu u është mohuar qasja në informacion të klasifikuar.
“Kam vendosur se nuk është më në interesin kombëtar që individët e mëposhtëm të kenë akses në informacion të klasifikuar,” thuhet në një memorandum të publikuar nga Trump.
Në listë përfshihen edhe:
- Antony Blinken, ish-sekretar shteti
- Liz Cheney dhe Adam Kinzinger, ish-kongresmenë republikanë
- Fiona Hill, ish-këshilltare për çështjet ruse
- Jake Sullivan, këshilltar për sigurinë kombëtare
- Lisa Monaco, zëvendësprokurore e përgjithshme
- Si dhe emra të tjerë të shquar si Letitia James, Alvin Bragg, Andrew Weissmann, Alexander Vindman.
Zyrtarët e lartë dhe ish-presidentët në SHBA tradicionalisht ruajnë lejet e sigurisë si një akt protokollar. Ky vendim përfaqëson një prishje të rregullave të padeklaruara dhe konsiderohet nga analistët si një hakmarrje politike ndaj kritikëve dhe kundërshtarëve të Trump.
Revokimi i lejeve të sigurisë ngre shqetësime mbi politizimin e institucioneve të sigurisë dhe përkeqëson më tej përçarjen mes kampeve politike në Amerikë.