Një ngjarje e rëndë tronditi mbrëmjen e së dielës qytetin e Vushtrrisë, ku një 19-vjeçar me inicialet A.Z. u vra me armë zjarri nga një bashkëmoshatar i tij, B.D., po ashtu 19 vjeç. Ngjarja ndodhi rreth orës 20:35 në rrugën “Galip Badivuku”.
Sipas njoftimit të Policisë së Kosovës, i dyshuari është arrestuar pak orë pas ngjarjes dhe në shtëpinë e tij është zhvilluar një bastisje ku janë sekuestruar një armë e gjatë me pesë fishekë dhe një pistoletë, e dyshuar si arma e krimit. Në vendngjarje u gjetën edhe tri gëzhoja, të cilat u sekuestruan si provë materiale.
Zëdhënësi i Policisë për rajonin e Mitrovicës, Avni Zahiti, konfirmoi se ndaj të dyshuarit është caktuar masa e ndalimit policor, ndërsa hetimet janë duke vazhduar në koordinim me prokurorin e rastit për zbardhjen e plotë të rrethanave të kësaj vrasjeje të rëndë.
Motivi i ngjarjes mbetet ende i paqartë, ndërsa komuniteti lokal është tronditur nga kjo ngjarje tragjike që përfshin dy të rinj në moshë. Autoritetet kanë bërë thirrje për qetësi dhe bashkëpunim me organet e drejtësisë për zbardhjen sa më të shpejtë të rastit.