Evgeny Savostyanov, një prej figurave më të larta të shërbimit sekret rus, rrëfen motivet reale të presidentit rus – nga rikthimi i perandorisë te synimi për dominim global.
Evgeny Savostyanov, ish-kreu i KGB-së në Moskë dhe dikur bashkëpunëtor i afërt i Boris Yeltsin dhe Vladimir Putin, sot jeton në mërgim që nga viti 2023, pasi refuzoi të mbështeste pushtimin rus të Ukrainës. Në një intervistë ekskluzive, ai rrëfen se pavarësisht detyrave të ndryshme që ka mbajtur, roli i tij ka qenë gjithmonë analizimi i dokumenteve dhe parashikimi i zhvillimeve strategjike.
Objektivi madhor i Putinit: “Mbledhësi i Tokave Ruse”
Sipas Savostyanov, Putin nuk bën kompromis me ambicien për t’u futur në histori si “Mbledhësi i Madh i Tokave Ruse”, një lider që i jep fund shpërbërjes së perandorisë ruse, e cila sipas tij filloi më 1867 me shitjen e Alaskës.
Plani përfshin bashkimin e Ukrainës dhe Bjellorusisë në një shtet të vetëm, duke e rritur popullsinë në rreth 188 milionë dhe fuqizuar burimet e brendshme ekonomike dhe ushtarake. Kjo qasje, sipas tij, është një trashëgimi ideologjike e KGB-së së vjetër, që besonte se sa më e vogël të ishte Rusia, aq më e paqeverisshme do të bëhej.
Hegjemonia, ambicia e dytë
Evropa, sipas Savostyanov, duhet të zgjohet. Ai paralajmëron se pas përmbushjes së objektivit të parë, Putin synon të rifitojë rolin e hegjemonit global dhe evropian, të humbur pas shpërbërjes së Bashkimit Sovjetik. Kjo ambicie shtrihet përtej qeverive – është një rikthim drejt ndikimit të thellë të ish-strukturave të inteligjencës.
Putin është formuar nga dy linja brenda KGB-së:
- PGU (Drejtoria e Parë) – përgjegjëse për inteligjencën e huaj (sot SVR), përfaqësuar nga emra si Sergej Ivanov, Igor Sechin e Sergej Chemezov
- Kundërzbulimi – me figura si Patrushev dhe Ivanov
Sipas tij, fakti që sot dominon linja “e jashtme” tregon se Putin është i fokusuar te ndikimi ndërkombëtar dhe jo te menaxhimi i brendshëm.
Çfarë kërkon Putini nga negociatat?
Savostyanov thekson se presidenti rus do të pranojë një armëpushim të plotë vetëm kur të ndjejë se objektivat madhore janë arritur. Ukraina për të është pjesë e një formule gjeostrategjike që kërkon kontrollin e bregut të djathtë të lumit Dnieper, përfshirë Khersonin dhe zonat përreth. Kjo do i mundësonte Putinit të mbante presion të vazhdueshëm mbi Odessën, Transnistrinë dhe Kishinaun.
Për këtë arsye, ai nuk do të pranojë kurrë vendosjen e forcave parandaluese evropiane në territorin ukrainas, të cilat i konsideron si “vija të kuqe”.