Sot, besimtarët myslimanë në mbarë botën shënojnë Natën e Kadrit, një nga netët më të rëndësishme dhe të bekuara të muajit të Ramazanit. Sipas besimit islam, kjo është nata kur zbriti Kurani i Shenjtë, dhe agjërimi e lutjet në këtë natë vlejnë më shumë se një mijë muaj.
Çfarë është Nata e Kadrit?
Sipas Suretul Kadr në Kuran, kjo natë përfaqëson momentin e zbritjes së parë të shpalljes hyjnore ndaj profetit Muhamed (a.s), duke shënuar fillimin e misionit të tij profetik. Kjo është nata kur përcaktohen fatet e krijesave për një vit, duke përfshirë jetën, vdekjen, begatinë, sprovat dhe të gjitha ndodhitë që do të shënojnë jetën e njerëzimit deri në Natën tjetër të Kadrit.
Ajetet që e përshkruajnë këtë natë:
“Ne e zbritëm atë (Kur’anin) në natën e Kadrit. E ç’të bëri ty të dish se ç’është nata e Kadrit? Nata e Kadrit është më e rëndësishme se një mijë muaj! Me lejen e Zotit, në atë natë zbresin engjëjt dhe shpirti (Xhibrili) për çdo çështje. Ajo është paqe deri në agimin e mëngjesit.” (El-Kadr, 1-5)
Ku qëndron vlera e kësaj nate?
Fjala “Kadr” do të thotë nderim, përcaktim dhe shtrëngim. Në këtë natë, zbresin aq shumë engjëj sa toka “shtrëngohet”. Ndërkohë, është edhe nata ku përcaktohet gjithçka që do të ndodhë gjatë vitit, nga jeta e çdo njeriu deri te sprovimet apo mëshirat që do të ndodhin.
Si duhet ta kalojnë besimtarët këtë natë?
Besimtarët këshillohen që ta kalojnë Natën e Kadrit me adhurim, lutje, pendim dhe dhikër. Një nga lutjet më të preferuara është:
“Allahuumme inneke afuvvun, tuhibbul afwe fa’fu anni.”
(O Allah, Ti je Falës dhe e do faljen, më fal mua!)
Gjithashtu, dhënia e sadakasë, lexim i Kuranit, falje e namazit të natës dhe salavate për Profetin Muhamed (a.s) janë veprime shumë të vlerësuara.
Hadithi i Profetit Muhamed (a.s) tregon vlerën e kësaj nate:
“Kush qëndron (duke u falur) Natën e Kadrit me besim dhe në pritje të shpërblimit nga Allahu, i falen mëkatet e mëparshme.”
Nata e Kadrit është një dhuratë hyjnore për besimtarët, një natë për reflektim, mëshirë dhe falje. Besimtarët këshillohen të mos e humbasin këtë mundësi të rrallë për afrim me Zotin dhe për të ndikuar pozitivisht në jetën e tyre shpirtërore e morale gjatë gjithë vitit.