Një ngjarje e rëndë ka tronditur mbrëmjen e djeshme kryeqytetin e Kosovës. Rreth orës 22:30, në rrugën “Rrustem Hyseni” në Prishtinë, janë raportuar të shtëna me armë zjarri që kanë rezultuar fatale për një prej të plagosurve.
Viktima është identifikuar si Naser Gashi, 62 vjeç, i cili nuk ka mundur t’i mbijetojë plagëve të marra. Burime pranë hetimit bëjnë me dije se krahas plagëve nga armë zjarri, ai ka pasur edhe një goditje me thikë në gjoks, çka e bën ngjarjen edhe më tronditëse.
Ngjarja ka lënë të plagosur edhe një tjetër shtetas, Miftar Miftari, i cili ndodhet në spital duke marrë ndihmë mjekësore dhe është jashtë rrezikut për jetën.
Autori i dyshuar i ngjarjes është Alban Gashi, i cili është identifikuar nga policia dhe tashmë është shpallur në kërkim. Sipas informacioneve paraprake, hetuesit janë duke mbledhur prova për zbardhjen e rrethanave të plota të ngjarjes.
Kjo vrasje e rëndë vjen në një periudhë të tensionuar për sigurinë në Kosovë, ku vetëm në tre ditë janë regjistruar katër vrasje, çka ka shtuar presionin ndaj autoriteteve për marrjen e masave urgjente.
Policia e Kosovës vijon punën për kapjen e autorit dhe nxjerrjen e plotë të dinamikës së ngjarjes.