Një skandal i paprecedentë ka përfshirë themelet e drejtësisë shqiptare, ku në qendër të akuzave ndodhet Arta Mandro, pedagoge e brendshme në Shkollën e Magjistraturës dhe njëherësh anëtare e Këshillit të Lartë të Prokurorisë (KLP). Ajo akuzohet se ka përdorur pozicionin e saj për të futur të birin Artili Mandro në Shkollën e Magjistraturës në mënyrë të paligjshme, pavarësisht se rregullorja ndalon qartësisht pranimin e të afërmve të stafit të brendshëm.
Jo vetëm që Artili Mandro u pranua në mënyrë të dyshimtë në vitin 2023, por më keq akoma – ai u kap duke kopjuar në provimin e datës 30 qershor 2024. Pamjet e siguruara nga “Fiks Fare” e tregojnë qartë duke lëvizur në sallën e provimit, duke hyrë e dalë nga salla, dhe madje duke ndryshuar tezat e tij pas përfundimit të orarit zyrtar, nën sytë e monitoruesve që jo vetëm nuk reagojnë, por ndihmojnë në manipulimin e rezultatit.
Nga përjashtimi në 2021 te privilegji në 2023
Në vitin 2021, Artili Mandro ishte përjashtuar nga gara për të hyrë në Magjistraturë, pikërisht për shkak të konfliktit të interesit me të ëmën, pedagoge aktive në atë institucion. Por vetëm dy vite më vonë, ai jo vetëm që kthehet në listën e kandidatëve, por edhe pranohet, përfitoi rrogë si student dhe sot është në vitin e dytë – në prag të emërimit si gjyqtar.
Skema e turpit: nga kopjimi te promovimi
Pamjet e siguruara nga “Fiks Fare” tregojnë një realitet alarmant: kandidatët për gjyqtarë lëvizin të lirë gjatë provimit, dalin nga salla, marrin informacion në korridore ku ishin publikuar përgjigjet, dhe më pas rikthehen për të ndryshuar tezat. Një nga kandidatët – A.M. – pra Artili Mandro, printon tezën, e dorëzon, por më pas rikthehet, e rishkruan dhe e dorëzon sërish, ndërsa monitoruesja gris të parën. Një manipulim në zemër të sistemit që do të duhej të përgatiste njerëzit që japin drejtësi.
Arta Mandro: pedagoge, anëtare e KLP dhe “influencuese” në drejtësinë e re
Në vitin 2023, Arta Mandro u dekorua nga Presidenti Bajram Begaj me titullin “Mjeshtër i Madh”, ndërkohë që ishte në kulmin e ndërhyrjes së saj për të futur të birin në sistem. Por kjo nuk është e gjitha. Ajo pritet të jetë pjesë e votimit për zgjedhjen e kryetarit të ri të SPAK në dhjetor, duke ngritur një konflikt të drejtpërdrejtë interesi mes një anëtareje që duhet të mbikëqyrë, dhe një institucioni që mund të hetojë atë vetë.
Kjo nuk është drejtësi, kjo është farsë
Çfarë drejtësie mund të japë një gjyqtar që ka hyrë në sistem në mënyrë të paligjshme dhe është kapur duke kopjuar? Çfarë mesazhi u jep kjo ngjarje studentëve të tjerë që studiojnë me meritë dhe qytetarëve që presin drejtësi nga institucione të reja? Kjo është shkatërrimi i besimit tek drejtësia, në një sistem që pretendon reformim, por që në thelb vazhdon të funksionojë me pazare, emërime nepotike dhe heshtje bashkëpunuese.
A do të hetojë SPAK këtë skandal?
Publiku pret përgjigje të drejtpërdrejta: a do të hetojë SPAK këtë rast të rëndë të favorizimit familjar, falsifikimit në provime dhe shkeljes së rregullores së Magjistraturës? Apo do të heshtë, nga frika se Arta Mandro do të votojë për kreun e ri të këtij institucioni?
Në një vend normal, një skandal i tillë do të sillte dorëheqje të menjëhershme, ndalim të ushtrimit të detyrës dhe ndjekje penale për abuzim me detyrën dhe korrupsion. Në Shqipëri, ai shërben si provë shtesë se drejtësia e re nuk është më e drejtë – por më e sofistikuar në maskimin e padrejtësisë.
Drejtësia nuk ndërtohet me kopje e pazare familjare. Ajo ose është për të gjithë, ose është farsë për të dobëtit.