Një tjetër skandal ushqimor trondit Shqipërinë, me përmasa që shkojnë përtej neglizhencës dhe rrezikojnë seriozisht shëndetin publik. 27 ton mish pule të infektuar me bakterin e rrezikshëm “Salmonella Typhimurium” janë futur në vend nga Brazili, dhe të paktën 13.5 ton janë shitur në treg, pa pritur analizat e Autoritetit Kombëtar të Ushqimit (AKU).
Në qendër të kësaj historie qëndron emri i Mondi Goxhës, pronarit të dy kompanive të përfshira: “diMal Inc.” dhe “AMG Food”. Fillimisht ai përpiqet të mashtrojë publikun me një deklaratë që e distancon nga përgjegjësia, por më pas pranon vetë se ka shitur mishin e infektuar, pa ditur as vetë se sa saktësisht.
Kompania mashtron, konsumatorët paguajnë
Fillimisht, “diMal Inc.” del me një deklaratë publike duke u viktimizuar dhe duke pretenduar se nuk ka lidhje me mishin e kontaminuar, duke ia hedhur fajin një “furnitori të jashtëm”. Por faktet tregojnë të kundërtën: furnitori është kompania tjetër e vetë Goxhës – “AMG Food”. Pra, publikisht “diMal” fshihet, ndërsa “AMG” pranon të vërtetën: mish i infektuar është shitur.
Për më tepër, ndërsa “AMG Food” pretendon se ka bashkëpunuar me AKU dhe ka dorëzuar 154 fatura, AKU e përgënjeshtron kategorikisht këtë pretendim, duke deklaruar se kompania nuk ka bashkëpunuar, ka fshehur dokumentacionin dhe ka penguar gjurmueshmërinë e produktit të rrezikshëm, i cili është shpërndarë në 10 qarqe të vendit, kryesisht në Tiranë dhe Kukës.
Një koktejl i rrezikshëm: salmonela, arrogancë dhe heshtje shtetërore
Bakteri Salmonella Typhimurium është i njohur për pasojat e tij të rënda: temperaturë të lartë, diarre, ethe tifoide, madje edhe vdekje në rastet më të rënda. Ndërsa pjesa më e madhe e mishit ishte shitur, AKU heshti, ISUV bëri analizat me vonesë dhe Ministria e Bujqësisë nuk tha asnjë fjalë. U deshën ditë të tëra për të reaguar, ndërkohë që qytetarët e konsumuan produktin, të painformuar dhe të pambrojtur.
“Cilësia e ushqimit vjen nga burimi”, thotë slogani i Dimal. Dhe burimi është… Salmonela?
Kompania “diMal” reklamon në faqen e saj zyrtare: “Cilësia vjen nga burimi”. Dhe tani dihet qartë burimi: mish i kontaminuar nga Brazili, i shitur në mënyrë të papërgjegjshme nga vetë kompania, pa pritur rezultatet laboratorike dhe pa lajmëruar rrjetet e shitjes, përfshirë supermarkete si Big Market, Joena, Euromarket dhe Xhangolli.
Kjo nuk është më thjesht një shkelje administrative, por një akt kriminal që ka vënë në rrezik jetën e konsumatorëve shqiptarë.
“Nuk di sa kam shitur,” – përgjigjja e një pronari që tallet me publikun
I kontaktuar nga media, Mondi Goxha shprehet: “Kam shitur nga malli që ka ardhur i importuar, por nuk kam dijeni sesa. Tani jam nën presion.” Një përgjigje që tregon se ky nuk është një sipërmarrës, por një njeri që ka humbur çdo kontroll mbi kompanitë që drejton dhe çdo ndjenjë përgjegjësie ndaj jetës së njerëzve.
Çfarë pritet më tej?
Skandali është tashmë në duart e Prokurorisë së Tiranës, e cila duhet të veprojë menjëherë, duke hetuar jo vetëm kompanitë e Mondi Goxhës, por edhe AKU-në, ISUV-in dhe strukturat që lejuan shpërndarjen e mishit pa pritur analizat.
Në një shtet që funksionon, një ngjarje e tillë do të sillte dorëheqje, arrestime dhe ndalim të menjëhershëm të aktivitetit të kompanisë përgjegjëse.
Por në Shqipërinë e 2025-s, qytetarët duhet ende të informohen nga media, të rrezikojnë shëndetin për një copë mish, ndërsa institucionet heshtin dhe bizneset e pandershme pasurohen.
Drejtësia nuk duhet të flejë. Jeta e qytetarëve nuk është eksperiment tregtar.