Presidenti i Partisë Republikane, Fatmir Mediu, ka bërë të ditur se një ekip i rëndësishëm ndërkombëtar do t’i bashkohet opozitës shqiptare për zgjedhjet e 11 majit. Në një postim në rrjetet sociale, Mediu konfirmoi se Chris LaCivita, strateg i fushatës së Donald Trump dhe drejtues i fushatës së koalicionit opozitar “Aleanca për Shqipërinë Madhështore”, do të vijë në Shqipëri javën që vjen, së bashku me ekipin e tij.
“Prej javës tjetër, ekipi i Chris do të jetë non stop në Shqipëri në krah të opozitës deri në fitoren më 11 maj,” shkroi Mediu pas një dreke pune me LaCivita dhe Phil Griffin, ish-president i MSNBC dhe figurë e njohur në botën mediatike amerikane.
Ky zhvillim shihet si një përforcim i rëndësishëm për opozitën shqiptare në prag të zgjedhjeve, me qëllim profesionalizimin e strategjisë elektorale dhe rritjen e ndikimit të mesazheve politike. LaCivita, i njohur për sukseset e tij në fushata të profilit të lartë, pritet të sjellë një qasje më agresive dhe të koordinuar ndaj fushatës së mazhorancës.
Kjo lëvizje vjen në një moment kur Partia Demokratike dhe aleatët e saj po intensifikojnë përpjekjet për të sfiduar pushtetin aktual dhe për të përçuar një frymë ndryshimi në opinionin publik.
Për më tepër, prania e një emri të rëndësishëm si Griffin, i cili ka pasur një rol kyç në ndërtimin e linjës editoriale të një prej rrjeteve më të mëdha televizive në SHBA, sugjeron një ofensivë të re mediatike nga opozita shqiptare.
Fushata për 11 majin është zyrtarisht në nisje e sipër dhe me angazhimin e aktorëve ndërkombëtarë, pritet të jetë ndër më të fortat dhe më të strukturuarat e dekadës së fundit.