
Kreu i Partisë Demokratike, Sali Berisha, ka deklaruar në emisionin “Opinion” se Chris LaCivita, bashkëkryetari i Komitetit Kombëtar Republikan dhe këshilltar elektoral i afërt me Donald Trump, do të vijë në Shqipëri me nisjen e fushatës elektorale.
“Jemi Në Komunikim të Përditshëm Online”
Berisha sqaroi se komunikimi me LaCivitën është i vazhdueshëm dhe se vizita e tij në Shqipëri pritet të ndodhë sapo të çelet zyrtarisht fushata.
“Do vijë këto ditë kur të hapet fushata. Jemi në kontakt të përditshëm online me të,” – tha Berisha.
Asnjë Ftesë Për Në SHBA
Duke iu referuar zërave që LaCivita do të sillte një ftesë zyrtare për udhëtim drejt SHBA-së, Berisha i mohoi kategorikisht këto pretendime. Ai theksoi se LaCivita nuk është lobist, por një këshilltar elektoral me rol të qartë politik brenda Partisë Republikane amerikane.
“Absolutisht kurrë! Ai është konsulent elektoral, jo lobist. Është bashkëkryetar i Komitetit Kombëtar Republikan,” – tha Berisha.
“Ai E Njeh Situatën. Nuk Ka Asnjë Dyshim Për Fitoren”
I pyetur për mendimin e LaCivita mbi zgjedhjet, Berisha u shpreh me bindje se amerikani ka një “feeling fitues” për opozitën shqiptare.
“Ai e njeh situatën. Ka feeling. E sheh fitoren. Ai nuk e vë në dyshim kurrë. Kur ai e thotë, është një shenjë e qartë për fitore.”