Zbulohet rrjeti i infiltruar: dy punonjës shtetërorë, një sekretar në ministri dhe pikëpyetje që lidhen me “peshq të mëdhenj”
Një ndërhyrje kibernetike brenda sistemit të drejtësisë shqiptare ka ekspozuar një realitet tronditës: prokurorë të posaçëm dhe drejtues të lartë të SPAK janë vënë në shënjestër të një grupi të strukturuar kriminal. Të arrestuarit – Zambak Gjoni dhe Arnold Rrokaj – nuk janë hakerë ndërkombëtarë, por ish-zyrtarë shtetërorë shqiptarë me akses të brendshëm në sistem.
Sipas SPAK, hakerimi ka pasur në objektiv adresat e email-it të prokurorëve, përfshirë edhe atë të kreut të SPAK, Altin Dumani, ku është tentuar të ndërhyhet, por pa sukses. Megjithatë, materiale të ndjeshme janë shkarkuar dhe shpërndarë, përmes një rrjeti që përfshinte dhe zyrtarë me të kaluar në kryeministri e ministri të Brendshme, si Dritan Palnikaj.
Jo thjesht hakerim, por strukturë me porosi?
Faktet e deritanishme flasin për një operacion të mirëorganizuar, me burime, qëllim dhe shtrirje të gjërë institucionale. SPAK flet për hetim të nisur mbi një grup të strukturuar kriminal, por emrat që po përmenden dhe rolet e tyre në administratë hedhin hije dyshimi mbi mundësinë e ndikimit politik ose infiltrimeve nga jashtë.
Pse synuan Altin Dumanin? A kishte në dorë dosje të rrezikshme?
Pyetjet janë të shumta:
- Kush e porositi këtë sulm?
- A do të shkojë SPAK deri në fund?
- A do t’i ndëshkojë vetëm “gishtrinjtë” apo edhe “trurin”?
SPAK deklaron se nuk janë prekur dosjet hetimore, por vetë fakti që email-et e prokurorëve ishin objekt sulmi tregon një përpjekje për paralizim institucional, dezinformim dhe ndoshta, shantazh.
A është prekur sistemi i brendshëm i SPAK?
Jo. Sipas deklaratës zyrtare, ndërhyrja është bërë vetëm në email-et e disa prokurorëve, jo në dosjet ose sistemin e IT-së.
Kush janë të arrestuarit?
Zambak Gjoni – ish-zyrtar i Burgjeve, dhe Arnold Rrokaj – ish-punonjës i Inspektoratit të Mjedisit. Të dy kanë pasur akses të drejtpërdrejtë në rrjete institucionale.
Cili është lidhja me Dritan Palnikajn?
Palnikaj ka mbajtur pozicione të rëndësishme, përfshirë Sekretar i Përgjithshëm në Ministrinë e Brendshme dhe në Kryeministri. Ai është marrë në pyetje dhe telefoni i tij është sekuestruar.
A ka dyshime për bashkëpunim të brendshëm në SPAK?
Zyrtarisht, jo. SPAK thotë se nuk ka prova për bashkëpunim të brendshëm, por hetimet vazhdojnë.