Prokuroria italiane në Romë përgatitet të ngrejë akuza ndaj nënës së Mark Samsonit
Hetimet për vrasjen brutale të Ilariа Sulës, 22-vjeçares shqiptare nga Terni, po hyjnë në një fazë të re. Autori i dyshuar, Mark Samson, 23 vjeç me origjinë filipinase, ka pranuar krimin, por të dhënat e fundit ngrenë pikëpyetje serioze mbi pjesëmarrjen e nënës së tij, e cila sipas burimeve ka parë trupin e pajetë të vajzës dhe e ka ndihmuar të birin të pastrojë skenën e krimit.
Krimi ndodhi në shtëpinë familjare në Via Homs, Romë, më 26 mars. Ilaria kishte shkuar për t’i kthyer disa rroba ish-partnerit të saj. Pasi kaluan natën bashkë, sipas dëshmisë së Samsonit, ai e vrau nga xhelozia, por pretendon se e donte.
Nëna e autorit përballet me hetuesit
Sipas agjencisë italiane LaPresse, nëna e Samsonit ka hyrë në dhomë pas dëgjimit të britmave, ka parë trupin e pajetë të vajzës dhe më pas ka marrë pjesë në fshirjen e provave. Edhe pse ende nuk është zyrtarisht nën hetim, ajo është thirrur për t’u marrë në pyetje ditën e hënë, më 7 prill, ora 14:00, në Seksionin e Vrasjeve në Policinë e Romës.
Prokuroria pritet ta regjistrojë si të dyshuar, gjë që mund të pasohet me akuza për bashkëpunim në fshehjen e krimit ose pengim të drejtësisë.
Çfarë ndodhi me Ilariа Sulën?
Ajo u vra më 26 mars në Romë nga ish-i dashuri i saj, Mark Samson, i cili më pas futi trupin në një valixhe.
Pse është në hetim nëna e tij?
Sepse dyshohet se e ka parë skenën e krimit dhe e ka ndihmuar djalin për ta fshehur.
A ka pranuar autori krimin?
Po, Samson e ka pranuar vrasjen dhe ka dhënë detaje të hollësishme për ngjarjen.
Çfarë ndodh tani?
Hetuesit do të marrin në pyetje nënën dhe pritet të vendosin për regjistrimin e saj si bashkëpunëtore në fshehjen e krimit.