Tirana përfshihet nga një stuhi zbulesash tronditëse. CNA ka publikuar faqen 69 të dosjes së përgjimeve të pretenduara ndaj kryebashkiakut të Tiranës, Erion Veliaj, i cili nga qelia e paraburgimit në Durrës, duket se ka vijuar të drejtojë dhe kontrollojë çdo detaj të fushatës së tij mediatike dhe politike.
Në komunikimet e siguruara, Veliaj shfaqet i shqetësuar për rënien e ritmit të fushatës publike në mbrojtje të tij, ndërsa bashkëshortja Ajola Xoxa raporton për presione, kontrolle të ashpra dhe thirrje të çuditshme nga Konsullata Amerikane.
“Mos u ndalni, mbajeni ritmin!”
Nga burgu, Veliaj i jep urdhra të qarta familjes dhe bashkëpunëtorëve:
“Duhet të vazhdojmë postimet çdo ditë. Mos u ndalni, mbajeni ritmin. Kam një ndjesi që po zbehet pak nga ritmi i fushatës mediatike.”
Në një tjetër moment, ai shfaqet i revoltuar me Ministrinë e Drejtësisë, duke u ankuar për mënyrën se si po trajtohet:
“A është normale që Ministria e Drejtësisë po na trajton si kriminelë lufte? Po çfarë mesazhi duan të japin?”
Këshilla për Ajola Xoxën dhe frika nga Prokuroria
Bashkëshortja e tij, Ajola Xoxa, rrëfen se është thirrur në Konsullatën Amerikane, por Veliaj e këshillon që të mos shkojë, duke përmendur një emër të njohur në arenën ndërkombëtare:
“Mos shko, se kur të vijë Aleksi (dyshohet se është Alex Soros), gjithçka do rregullohet.”
Ndërkohë, Ajola shpreh shqetësimin se janë thirrur në Prokurori nëna dhe daja i saj:
“Po më shqetëson fakti që kanë thirrur mamanë dhe dajën tim. Pse duan ata tani?”
Përgjigja e Veliajt është e qartë dhe me tone udhëzuese:
“Do u thuash se nuk kanë lidhje. Mami të thotë që nuk di gjë, daja të bëjë njësoj. I udhëzojmë.”
Presion ndaj institucioneve dhe Dhoma e Avokatisë në shënjestër
Në fund të faqes 69, Veliaj jep një tjetër direktivë të qartë për të ushtruar presion ndaj institucioneve të drejtësisë:
“Duhet të nisim një lëvizje te Dhoma e Avokatisë. Të vënë nën presion ILD-në. Ata janë të dobët.”
Në vijim: Faqja 70 – Alarm për transferim në burg tjetër, presion mbi mediat dhe urdhra për Mero Bazen e Genti Sulën.