Zbulohet roli i tmerrshëm i nënës së Mark Samson në krimin që tronditi Italinë
Një rrëfim tronditës ka dalë nga hetimi për vrasjen e Ilaria Sulës, 22-vjeçares me origjinë shqiptare që u godit për vdekje me thikë nga ish-i dashuri i saj, Mark Antony Samson. Në një dëshmi që zgjati mbi tre orë, nëna e autorit, Nors Man Lapaz, ka pranuar se ndihmoi djalin të pastronte shtëpinë dhe të fshinte gjurmët e gjakut, duke e bërë bashkëpunëtore në fshehjen e krimit.
Djali vrau me thikë, nëna pastroi skenën e krimit
Sipas hetimit, vrasja ndodhi rreth orës 11:00 të mëngjesit, kur Samsoni, i shtyrë nga xhelozia pasi pa një mesazh në telefonin e Ilarias, e goditi me një thikë kuzhine në qafë, duke i shkaktuar hemorragji fatale. Në atë moment, nëna e tij ndodhej në shtëpi dhe më pas u përfshi në fshehjen e krimit, duke pastruar gjurmët dhe ndihmuar në zhdukjen e trupit.
“E ndihmova të pastronte shtëpinë dhe të fshinte gjithë atë gjak,” ka pranuar ajo përpara hetuesve.
Trupi i pajetë i Ilarias u mbështoll me plastmas dhe u fut në një valixhe, të cilën Samson e tërhoqi zvarrë deri tek makina dhe më pas e braktisi në zonën Polit rreth orës 14:00.
Hetimet: Provat e telefonit e fundosën nënën
Ekspertët zbuluan se qelizat telefonike e lokalizonin nënën në vendin e ngjarjes, ndërkohë që dëshmia e saj përputhet me analizat forensike që tregojnë për pastrim të skenës së krimit. Kjo i hapi rrugën akuzës zyrtare për bashkëpunim në fshehjen e kufomës.
“Mark veproi me gjakftohtësi dhe pa ndjeshmëri,” deklaroi gjykatësi, duke e cilësuar sulmin si “brutal”.
Babai, i tërhequr por nën hetim
Babai i Samsonit, megjithëse nuk rezulton të ketë qenë i pranishëm në momentin e vrasjes, mbetet nën vëzhgimin e prokurorisë, për të përcaktuar nëse ka dijeni apo përfshirje në ngjarje.
“Prindërit janë të shkatërruar, të tronditur dhe kërkojnë falje të sinqertë,” – deklaroi avokati i tyre pas daljes nga komisariati.
Çfarë pranoi nëna e autorit?
Pranoi se ndihmoi në fshirjen e gjurmëve të gjakut dhe pastrimin e shtëpisë pas vrasjes.
A ishte e pranishme gjatë krimit?
Po, ndodhej në shtëpi gjatë momentit të vrasjes.
Për çfarë akuzohet aktualisht?
Për bashkëpunim në fshehjen e një kufome, ndërsa djali akuzohet për vrasje me paramendim.
Ku u gjet trupi i Ilarias?
I vendosur në një valixhe dhe i braktisur në zonën Polit, disa orë pas vrasjes.
Ngjarja vazhdon të tronditë opinionin publik, ndërsa drejtësia italiane pritet të ngrejë akuza të plota për gjithë familjen e përfshirë në një nga krimet më të ftohta dhe më të diskutueshme të kohëve të fundit.