Partia Demokratike çel zyrtarisht fushatën për zgjedhjet parlamentare të 11 majit, me një aktivitet të madh në sheshin Nënë Tereza dhe prezantimin publik të strategut amerikan Chris LaCivita.
Përgatitjet për çeljen e fushatës kanë nisur që herët, me skenografi të frymëzuar nga mitingjet e Donald Trump në SHBA. Gazetari Osman Stafa raporton se skena e ndërtuar është njësoj me atë të përdorur në fushatën presidenciale të Trump në nëntor 2024, një sinjal i qartë për stilin agresiv dhe vizual që synon PD.
Në aktivitetin që nis në orën 19:00, do të mbajnë fjalime:
- Kreu i PD, Sali Berisha
- Drejtuesi i fushatës Chris LaCivita, që për herë të parë nuk do të qëndrojë në prapaskenë, por do të ngjitet në podium.
Po ashtu, në skenë do të ngjiten edhe përfaqësues të grupeve që PD i konsideron të shtypura nga qeveria aktuale, përfshirë familjarë të pacientëve të Onkologjikut, që do të tregojnë historitë e tyre.
Kjo është hera e parë që LaCivita shfaqet si figurë aktive në një fushatë jashtë SHBA-së, duke u pozicionuar si risi në strategjinë e re të demokratëve për të krijuar një imazh global dhe përballues ndaj pushtetit të personalizuar të Edi Ramës.
LaCivita do të jetë gjithashtu i pranishëm në takimin e së dielës me diasporën në Itali, ku PD synon të mobilizojë votën e emigrantëve.
Ky pozicionim i ri i Partisë Demokratike sinjalizon një përpjekje për frymë të re dhe stil ndërkombëtar në komunikim elektoral, ku figura si LaCivita marrin rol protagonisti në betejën elektorale.