Deputeti i Partisë Demokratike Xhelal Mziu dhe nipi i tij, janë referuar në Prokurorinë e Posaçme (SPAK) pas një incidenti të rëndë të ndodhur gjatë fushatës zgjedhore në fshatin Ostren, Bulqizë.
Sipas njoftimit zyrtar të Policisë, ngjarja ka ndodhur më 24 prill 2025, rreth orës 13:00, menjëherë pas një takimi elektoral të koalicionit “PD-Aleanca për Shqipërinë Madhështore”. Të dy të dyshuarit – deputeti Xh. M., 58 vjeç dhe nipi i tij E. M., 36 vjeç, me banim në Tiranë – akuzohen se kanë dhunuar fizikisht një zyrtar të njësisë administrative Ostren, Kalosh Murra, 33 vjeç, përgjegjës i ndihmës ekonomike në zonë.
“Specialistët për Hetimin e Krimeve të Komisariatit të Policisë Bulqizë referuan materialet në SPAK për veprën penale ‘Kanosja apo dhunimi ndaj pjesëmarrësve në zgjedhje’,” – thuhet në deklaratë.
Xhelal Mziu është një nga emrat kryesorë në listën e kandidatëve për deputetë në Qarkun e Dibrës, dhe ky zhvillim mund të ndikojë ndjeshëm në perceptimin publik për fushatën e opozitës në këtë zonë.
Aktualisht, SPAK ka nisur hetimet paraprake, ndërsa nuk është dhënë ende një reagim publik nga vetë Mziu apo nga Partia Demokratike lidhur me akuzat.