Presidenti i Serbisë, Aleksandar Vuçiç, ka deklaruar publikisht se do të mbajë premtimin e tij dhe do të marrë pjesë në ceremonitë e Ditës së Fitores në Moskë, pavarësisht paralajmërimeve të forta nga Bashkimi Europian. Kjo lëvizje, në një moment delikat për marrëdhëniet mes Serbisë dhe Perëndimit, shihet si një sfidë direkte ndaj Brukselit.
Sipas mediave ndërkombëtare, Komisionerja për Zgjerim e BE-së, Marta Kos, gjatë vizitës së saj në Beograd, ka paralajmëruar qartë se Serbia rrezikon procesin e anëtarësimit në BE nëse Vuçiç vendos të udhëtojë drejt Moskës për ngjarjen e planifikuar.
“Jam i përgatitur për çdo ndëshkim që mund të vijë nga BE-ja,” – mësohet të ketë thënë Vuçiç, duke nënvizuar vendosmërinë për të ruajtur marrëdhëniet tradicionale me Rusinë, edhe në kushtet e presioneve politike dhe diplomatike nga Perëndimi.
Kjo deklaratë vjen në një kohë kur BE-ja ka rritur presionin ndaj vendeve kandidate për të harmonizuar politikën e tyre të jashtme me atë të unionit, veçanërisht në raport me luftën në Ukrainë dhe qëndrimin ndaj Kremlinit.
Vizita e Vuçiç në Moskë, e planifikuar për javën e ardhshme, përkon me festimet tradicionale të fitores mbi nazizmin në Luftën e Dytë Botërore, të cilat këtë vit kanë marrë një ngarkesë të fortë politike për shkak të luftës së Rusisë në Ukrainë.
Kjo përplasje e re mes Beogradit dhe Brukselit hedh hije të forta mbi perspektivën europiane të Serbisë dhe hap një debat të ri për balancën që vendi kërkon të ruajë mes interesave lindore dhe integrimit perëndimor.