Kryeministri Edi Rama deklaroi se zgjedhjet e 11 majit përfaqësojnë më shumë se një garë politike për Partinë Socialiste. Në një intervistë për “Review” në Euronews Albania, ai theksoi se PS nuk i diskuton 71 mandatet, pasi, sipas tij, fitorja është e sigurt dhe objektivi është më i gjerë: mbyllja e negociatave për anëtarësimin në Bashkimin Europian deri në vitin 2027.
“Të dielën kemi takim me historinë. Nuk është për PS-në, as për ndonjë parti tjetër, është për Shqipërinë. 71 mandatet nuk diskutohen. Këtu flitet për një mesazh force nga populli shqiptar drejt Europës,” deklaroi Rama, duke kërkuar një votë të fortë për të vazhduar procesin e integrimit europian.
Ai u ndal edhe te ndjeshmëria publike, duke pranuar se pakënaqësia është pjesë e natyrshme e çdo shoqërie që synon më shumë.
“Asnjë popull nuk është kurrë i kënaqur. Nëse je i kënaqur, s’ke më ambicie. Edhe unë jam shumë i pakënaqur, sepse dua që gjërat të shkojnë shumë më mirë,” u shpreh ai.
Rama e përshkroi situatën si një rast historik që i është dhënë brezit aktual për të përmbyllur një kapitull të rëndësishëm të procesit të integrimit.
“Fati na ka dhënë mundësinë që në dy vitet e ardhshme të mbyllim negociatat që dikur nuk hapeshin dot,” shtoi ai.
Për çfarë flet Rama kur thotë se “nuk diskutohet 71-shi”?
Kryeministri shpreh bindjen se Partia Socialiste do të sigurojë shumicën e nevojshme parlamentare pa asnjë dyshim.
Cili është mesazhi që kërkon Rama nga zgjedhjet?
Një mbështetje e gjerë që të përkthehet në një mandat të fortë për të përmbyllur negociatat me BE deri në vitin 2027.
Si e interpreton Rama pakënaqësinë popullore?
Si një shenjë ambicieje dhe dëshire për përmirësim, jo si refuzim ndaj qeverisjes.